Ilon Masktyń kompanııasy adam mıyna Neuralink ımplantyn ornatty

ASTANA. KAZINFORM — 28 qańtarda Ilon Masktyń Neuralink neırotehnologııalyq kompanııasy alǵash ret adam mıyna ımplant saldy. Bul týraly TASS aqparat agenttigi jazdy. 

«Neuralink ımplanty birinshi ret adam mıyna salyndy, onyń qalpyna kelýi [otadan soń] jaqsy júrip jatyr», - dep jazdy Mask X (burynǵy Twitter) áleýmettik jelisindegi paraqshasynda.

Kásipkerdiń atap ótýinshe, Neuralink kompanııasynyń alǵashqy ónimi Telepathy dep atalady. Bul chıp múmkindigi shekteýli adamdardyń telefon men kompıýterdi oı kúshimen basqarýyna múmkindik beredi.

«Bul chıptiń eń birinshi paıdalanýshylary alǵashqy paıdalanýshylary aıaq-qoldaryn basqarý qabiletinen aıyrylǵan adamdar bolady», - deıdi Mask.

Onyń aıtýynsha, atalmysh qurylǵynyń kómegimen múmkindigi shekteýli adamdar óz oıyn tez jetkize alatyn bolady.

«Stıven Hokıngtiń jyldam mátin terýshi qurylǵydan da tez sóılegenin elestetip kórińizshi. Keremet emes pe?! Biz osy maqsatqa jetýdi kózdeımiz», - dep jazdy mıllıarder.

Mask Neuralink startapyn 2016 jyldyń shildesinde qurǵan jáne ol bolashaqta adam mıyna ımplantatsııalanýy múmkin chıpterdi ázirlep jatyr.

Kásipkerdiń pikirinshe, mundaı neıroınterfeıster adamǵa jasandy ıntellektige qarsy turýǵa qabiletti kıborgqa aınalýǵa múmkindik beredi, sonymen qatar oı kúshin paıdalanyp kompıýterdi tikeleı basqarýdy úırenýge kómektesedi.