Ilon Mask Twitter-de moderatorlar keńesi paıda bolǵanyn jarııalady
ASTANA. QazAqparat - Twitter áleýmettik jelisiniń basshylyǵy «kontentti moderatsııalaý» boıynsha arnaıy keńes qurady. Onyń quramyna «kózqarasy aıtarlyqtaı ártúrli adamdar kiredi», dep habarlady 28 qazan kúni kompanııanyń jańa ıesi Ilon Mask. Bul týraly QazAqparat dw.com saıtyna silteme jasap habarlaıdy.
«Twitter ártúrli kózqarastary bar mazmundy moderatsııalaý keńesin qurady. Bul keńes jınalmaıynsha, eseptik jazbany júrgizýge nemese qalpyna keltirýge qatysty mańyzdy sheshimder qabyldanbaıdy», - dedi Mask.
Ol keńes músheleri men olardyń ókilettikteri týraly qosymsha málimet bermedi.
Bloomberg agenttiginiń habarlaýynsha, Mask Twitter-di satyp alǵannan keıin, basqalarmen qatar, áleýmettik jeli qoldanýshylaryn ómir boıy bloktaýdan bas tartýdy josparlap otyr. Osyndaı tyıym 2021 jyldyń qańtarynda Kapıtolıı ǵımaratynda jaqtastarynyń tártipsizdikterinen keıin akkaýnty buǵattalǵan AQSh-tyń burynǵy prezıdenti Donald Trampqa salynǵan edi.
Mask buǵan deıin áleýmettik jelini aqsha úshin emes, «ózi jaqsy kóretin adamzatqa kómektesý» maqsatynda satyp alý sheshimin qabyldaǵanyn málimdegen edi.
Buǵan I.Mask atalǵan áleýmettik jelini 44 mlrd dollarǵa satyp alǵanyn jazǵan edik.
Foto: enavabharat.com
