Ilon Mask Twitter basshysy qyzmetinen ketýge ýáde berdi

ASTANA. QazAqparat – Ilon Mask paıdalanýshylar arasynda ózi bastaǵan saýalnamaǵa daýys berý qorytyndylary boıynsha Twitter basshysy qyzmetinen ketetinin málimdedi, dep habarlaıdy QazAqparat VVS aqparat agenttigine silteme jasap.

«Osy jumysqa kelisetin aqymaq adamdy tapqan boıda basshylyqtan ketemin. Sodan keıin tek baǵdarlamalyq jasaqtama men serverler komandalaryna jaýapty bolamyn», - dep jazdy Mask ózi uıymdastyrǵan saýalnamaǵa túsiniktemede.

Mask jeksenbide osy jelide bastaǵan «Twitter basshylyǵynan ketkenim jón be?» degen saýalnamada qatysýshylardyń kópshiligi - 57,5% Masktyń Twitter saıasatyn basqarýdan bas tartqanyn jón dep tapty.

Saýalnamaǵa 17,5 mln qoldanýshy qatysty (respondentter arasynda bottardyń kóp bolǵany aıtylyp jatyr).

Saýalnamany jarııalaǵan kezde Mask kópshiliktiń sheshimin oryndaımyn dep ýáde berdi, biraq daýys berý aıaqtalǵan soń biraz ýaqyt boıy otstavka jóninde naqty eshteńe jazbady.

Eske sala keteıik, Ilon Mask Twitter-di 44 mıllıard dollarǵa satyp aldy. Ol Twitter-diń dırektorlar keńesin taratty.

BUU-nyń Adam quqyqtary jónindegi joǵarǵy komıssary Folker Tıýrk Twitter-diń bas atqarýshy dırektory Ilon Maskqa ashyq hat joldap, osy áleýmettik medıa arnasyn basqarýda adam quqyqtaryn basty orynǵa qoıýǵa shaqyrdy.

Ilon Mask Amerıkanyń burynǵy prezıdenti Donald Tramptyń osy áleýmettik jelidegi akkaýntyn bloktan shyǵarý-shyǵarmaý jóninde saýalnama ótkizip, qorytyndysy boıynsha sheshim shyǵardy.

Foto:NURPHOTO