Ilon Mask trıllıoner mártebesinen taǵy da aıyryldy
ASTANA. KAZINFORM — SpaceX aktsııalarynyń seısenbi kúni 3 paıyz quldyraýy Ilon Masktyń trıllıoner mártebesinen aıyrylýyna sebep boldy. Aktsııa qunynyń tómendeýinen kásipkerdiń baılyǵy shamamen 28,6 mlrd dollarǵa kemigen, dep habarlaıdy Kazinform agenttiginiń Vashıngtondaǵy menshikti Forbes basylymyna silteme jasap.
Seısenbi kúngi derekke saı, Ilon Masktyń taza baılyǵy 977,2 mlrd dollarǵa baǵalanǵan. Buǵan qosa Tesla kompanııasynyń aktsııalary da 0,5 paıyz arzandady.
Ilon Masktyń dáýleti ózi ıelik etetin eki kompanııanyń — SpaceX pen Tesla-nyń qarjylyq kórsetkishterine tikeleı baılanysty. Tamyz aıynda retteýshi organdarǵa usynylǵan qujattarǵa sáıkes, kásipker SpaceX aktsııalarynyń shamamen 48,4 paıyzyna, al Tesla aktsııalarynyń 11 paıyzyna ıelik etedi.
SpaceX kompanııasy maýsym aıynda aktsııalaryn qor naryǵyna shyǵaryp, IPO ótkizgennen keıin Ilon Mask álemdegi alǵashqy trıllıoner atandy.
Alaıda keıingi kúnderi kompanııa aktsııalarynyń quldyraýynan bul mártebesinen aıyryldy.
Keıingi birneshe aıda Ilon Masktyń baılyǵy birde artyp, birde kemip otyrdy. Ótken aptanyń sońynda Tesla men SpaceX aktsııalary qymbattaǵan soń ol trıllıoner mártebesin qaıta ıelendi.
SpaceX aktsııalarynyń arzandaýy seısenbi kúni Azııa naryqtarynda bastalǵan jasandy ıntellektke arnalǵan chıpterdi jappaı satýmen tuspa-tus keldi. Bul úrdis, eń aldymen, Ońtústik Koreıanyń SK Hynix jáne Samsung, sondaı-aq Taıvannyń TSMC kompanııalarynyń aktsııalaryna áser etti. AQSh-tyń Nvidia, Broadcom jáne Intel sekildi chıp óndirýshileriniń aktsııalary da eldiń shyǵys jaǵalaýyndaǵy bırjalar ashylǵannan keıin sál arzandady.
Buǵan deıin Ilon Mask Pentagonnyń jańa jobasyna qosylǵanyn habarlaǵan edik.
