Ilon Mask Tesla ótemaqysynyń arqasynda álemdegi eń alǵashqy trıllıoner atanýy múmkin
ASTANA. KAZINFORM - Tesla aktsıonerleri kompanııanyń negizin qalaýshy Ilon Maskqa 1 trln dollarǵa jýyq ótemaqy tóleıtin boldy, dep habarlaıdy VVS.
Beısenbi kúni ótken jyl saıynǵy jalpy jınalysta Tesla aktsıonerleriniń 75%-y buryn-sońdy bolmaǵan mólsherde bonýs berý sheshimin maquldady.
Bul kelisim Ilon Maskti aldaǵy jyldary elektromobılder shyǵaratyn kompanııanyń naryqtyq qunyn edáýir arttyryp, joǵary kórsetkishterge qol jetkizýdi mindetteıdi. Eger ol kelisimsharttaǵy mindetterin oryndasa, oǵan taǵy júzdegen mıllıon jańa Tesla aktsııalary tartý etiledi.
CNN atap ótkendeı, yqtımal ótemaqy Maskty tarıhtaǵy alǵashqy trıllıoner ete alady. Qazan aıynyń basynda kásipker baılyǵy 500 mlrd dollarǵa jetken alǵashqy adam bolǵan edi.
Qazir Tesla-nyń naryqtyq quny shamamen 1,4 trln dollar. Mask ony aldaǵy 10 jyl ishinde 8,5 trln dollarǵa deıin jetkizýi tıis. Sondaı-aq ol ózin-ózi basqaratyn mıllıondaǵan Tesla Robotaxi kólikterin kommertsııalyq paıdalanýǵa berýi kerek.
— Bizdiń jasaǵaly jatqan isimiz Tesla-nyń bolashaqtaǵy jańa taraýy ǵana emes, tutastaı jańa týyndy bolmaq. Aktsıonerlerdiń basqa jınalystary ish pystyrarlyqtaı bolsa, bizde qyzyqty is-sharalar bolady, — dedi Mask Ostındegi jıynda.
Bekitilgen kelisim Maskti Tesla kompanııasynda kem degende 7,5 jyl jumys isteýine baǵyttalǵan. Bul oǵan kompanııadaǵy úlesin 12-den 25%-ǵa deıin arttyrýǵa múmkindik beredi.
Mask buǵan deıin Tesla-ǵa bolashaqta sheksiz óse beretin kompanııa dep baǵa berdi. Eger ol avtonomdy júrgizý tehnologııalary men jasandy ıntellekt josparlaryn júzege asyrsa, Tesla álemdegi eń qymbat kompanııa bolatynyn aıtty.
Mask óz úlesi kompanııanyń bolashaǵyn aıqyndaı alatyndaı mólsherde ulǵaıtylmasa, Tesla-dan ketýi nemese basshylyqta ekinshi orynǵa yǵysýy múmkin ekenin tuspaldap aıtqan edi.
Tesla-nyń iri ınvestorlary, sonyń ishinde AQSh-tyq CalPERS pen Norvegııanyń álemdegi eń iri memlekettik zeınetaqy qorlary Ilon Maskqa bundaı úlken somada ótemaqy tóleýge qarsy bolǵan.
Aıta keteıik, buǵan deıin Tesla Ilon Mask úshin 29 mlrd dollar kóleminde jańa syıaqyny maquldaǵany jaıly jazǵan edik.
Kamıla Múlik