Ilon Mask Tesla-nyń maýsym aıynda robototaksı qyzmetin iske qosý josparyn rastady

ASTANA. KAZINFORM — Ilon Mask Tesla robototaksı qyzmeti maýsym aıynyń sońynda Ostınde (Tehas shtaty) 10 kólikten bastalatynyn jáne ushyrylym sátti ári oqys oqıǵasyz ótetin bolsa tez arada myńdaǵan kólikke keńeıetinin málimdedi, dep habarlaıdy NBC News. 

— Biz úshin az mólsherden bastap, bári jaqsy ekenine kóz jetkizip, sodan keıin aýqymdy keńeıtý oryndy, — dep habarlady Ilon Mask.

Seısenbide Ostınde CNBC-ge bergen suhbatynda Mask Tesla óziniń robototaksıin Ostındegi josparlanǵan debıýtten keıin Los-Andjeles pen San-Frantsıskoǵa ákelýge nıetti ekenin habarlady. 

2016 jyldan bastap Mask Tesla-nyń ınvestorlary, tutynýshylary jáne jankúıerlerine kompanııa jolaýshylardy adamnyń aralasýynsyz qaýipsiz tasymaldaýǵa qabiletti ózdiginen júretin kólik usynatynyna ýáde berdi. 

Tesla eń aldymen onyń robototaksıi «FSD Unsupervised» (tolyq avtonomdy júrgizý) bolashaq nusqasymen jabdyqtalǵan «Model Y» kólikteri bolatynyn málimdedi. 

Mask Tesla Ostındegi robototaksı qyzmeti úshin «geoaımaq» ornatatynyn málimdedi, ıaǵnı kompanııa bul kólikterdiń júrý oryndaryn shekteıdi. Tesla qyzmetkerleri kólik parkin qashyqtan baqylaıdy.

Tesla, sonymen qatar SpaceX jáne xAI kompanııalaryn basqaratyn Mask prezıdent Donald Tramptyń negizgi keńesshisi qyzmetin atqaryp otyr.

Bloomberg mıllıarderler ındeksi málimeti boıynsha, Tesla jáne SpaceX kompanııalaryndaǵy aktıvteriniń arqasynda Mask - álemdegi eń baı adam, al onyń dáýleti qazirgi ýaqytta shamamen 376 mlrd dollarǵa baǵalanyp otyr.

Buǵan deıin AQSh prezıdenti Donald Tramp óziniń keńesshisi ári kompanııanyń bas dırektory Ilon Maskty qoldaý belgisi retinde Tesla kóligin satyp alǵanyn jazǵan bolatynbyz.