Ilon Mask Tesla aktsııasyn satyp alý týraly málimdemesine baılanysty iste kinásiz dep tanyldy

ASTANA. QazAqparat - San-Frantsıskodaǵy alqabıler soty Tesla negizin qalaýshy Ilon Maskty 2018 jylǵy tvıtindegi alaıaqtyq týraly is boıynsha aqtady. Onda kásipker elektromobılder shyǵaratyn kompanııany jekeshelendirýdi talap etken edi. Investorlar ony osy habarlamamen mıllıondaǵan dollar shyǵyn keltirdi dep aıyptaǵan bolatyn, dep habarlaıdy QazAqparat VVS agenttigine silteme jasap.

San-Frantsıskodaǵy alqabılerge Ilon Maskty kinásiz dep taný úshin shamamen eki saǵat qajet boldy.

Kásipker sot sheshimine pikir bildirip, óziniń Twitter-degi paraqshasyna bylaı dep jazdy: «Qudaıǵa shúkir, adam danalyǵy jeńiske jetti! Men qazylar alqasyna Tesla 420 isindegi kinásizdikti biraýyzdan moıyndaǵany úshin qatty rızamyn».

2018 jyldyń 7 tamyzynda Mask óziniń Tvıtterinde Tesla-ny satyp alý jáne ony jeke kompanııa etý úshin «qarajat jınadym» dep málimdedi. Osy kezde fırmanyń aktsııalary kóterildi, biraq is júzinde onyń kompanııany satyp alý úshin qarajaty jetpedi. Bul týraly belgili bolǵan kezde aktsııalardyń quny kúrt tómendedi.

Osy kezeńde aktsııalardy satyp alǵan nemese satqan aktsıonerler Maskty alaıaqtyq jasaý arqyly baǵaly qaǵazdardyń qunyn ádeıi basqardy dep málimdedi. Sonyń saldarynan olar mıllıondaǵan dollar joǵaltty.

Masktyń ózi Saýd Arabııasynyń táýelsiz ınvestıtsııalyq qorynyń kelisimin alǵanyna senimdi ekenin jáne eshqandaı quqyq buzýshylyq jasamaǵanyn málimdedi. Bul is boıynsha basqa aıyptalýshylar, olardyń arasynda Tesla-nyń qazirgi jáne burynǵy jeti dırektory da zańsyz áreketter jasaǵanyn joqqa shyǵaryp otyr.

Foto:Getty Images/ Justin Sullivan