Ilon Mask Taılandtaǵy balalardy qutqaratyn qaıyq oılap tapty
ASTANA. QazAqparat - Kanadalyq-amerıkalyq ınjener jáne ónertapqysh Ilon MaskTaılandta sý alǵan úńgirde qamalyp qalǵan oqýshylardy qutqarýǵa arnalǵan shaǵyn sýasty qaıyǵyn oılap tapty, dep habarlaıdy QazAqparat Ilon Masktyń Týıtterdegi paraqshasyna silteme jasap.
«Taılandpen keri baılanys ornatyldy. Eń aldymen, Falcon zymyranynyń suıyq ottegi tutqasyn qoldaný arqyly shaǵyn sýasty qaıyǵyn jasadyq. Úńgirdiń kez kelgen jerinen ótip ketýi úshin óte jeńil jáne 2 súńgýir alyp júrý úshin shaǵyn etip oılastyrdyq. Sýasty qaıyǵy myqty etip jasalǵan», - dep jazdy Ilon Mask Týıtterdegi paraqshasynda.
Sondaı-aq, ónertapqysh sýasty qaıyǵyn synaqtan ótý sátiniń vıdeosyn júktegen.
Eske sala ketsek, 23 maýsym kúni Taılandtaǵy ulttyq park qyzmetkerleri úńgirge kire beriste mototsıkl men velosıpedterdi, sporttyq jabdyqtardy taýyp alǵan. Olar jergilikti fýtbol komandasyna habarlasyp, ol jaqtan tabylǵan zattardyń shynynda da 11-16 jas aralyǵyndaǵy 12 mektep oqýshysyna jáne 25 jastaǵy bapkerge tıesili ekenin rastaǵan. Olar adasyp ketken úńgirdiń ishi 10 shaqyrymdyq joldarǵa bólingen. Birneshe shyǵatyn jáne kiretin bólikteri bar. Taıland bıligi úńgirde habarsyz ketken balalardy qutqarý jumystaryn júrgizip jatyr.
Búgin atalǵan úńgirde qalyp qoıǵan tórt bala jerdiń betine shyǵaryldy.
