Ilon Mask Starship kemesi tórtinshi ushyrylymynyń ýaqytyn jarııalady

ASTANA. KAZINFORM – SpaceX úsh-bes apta ishinde Starship ǵarysh kemesiniń prototıpi bar zymyran tasyǵyshtyń tórtinshi synaq ushyrylymyn ótkizýdi josparlap otyr. Bul týraly SpaceX basshysy Ilon Mask málimdedi, dep habarlaıdy TASS aqparat agenttigi. 

Ol kemeniń sýretin X paraqshasynda (burynǵy Twitter) jarııalap, onyń ushýyna daıyndyq júrip jatqanyn jazdy. Paıdalanýshylardyń biri tórtinshi reıs qashan bolatynyn jáne Mask jańa ushyrý nátıjesinde qandaı maqsattarǵa jetýdi josparlap otyrǵanyn surady.

«3-5 aptadan keıin shyǵar. Maqsat – kemeniń maksımaldy qyzdyrý aımaǵynan (korpýsty) ótýi nemese kem degende ótken jolǵydan uzaǵyraq ushýy», - dep jaýap berdi kásipker. 

Úshinshi synaq ushyrylym 2024 jyldyń naýryz aıynda ótti. Ol kezde SpaceX Starship-tiń 77 km bıiktikte apparattyń atmosferaǵa enýi kezinde ushyrylymnyń 49-shy mınýtynda joǵalǵany týraly habarlady. SpaceX-tiń Starship prototıpin jer mańaıyndaǵy orbıtaǵa shyǵarýdyń aldyńǵy eki áreketi de sátsiz aıaqtaldy. 

Ázirleýshi kompanııanyń josparlaryna sáıkes, Starship ǵarysh júıesi ámbebap bolady jáne basqa nusqalarda tómen Jer orbıtasyna ushýlar, spýtnıkterdi ushyrý jáne Aıǵa, Marsqa, sondaı-aq odan alys aspan denelerine mıssııalardy oryndaý úshin paıdalanylýy múmkin.

Qaıta paıdalanýǵa bolatyn Super Heavy kúsheıtkishi men Starship Jerge tik qonady dep boljanyp otyr.