Ilon Mask SpaceX pen xAI kompanııalaryn biriktirmekshi

ASTANA.KAZINFORM — Ilon Masktyń SpaceX ǵarysh kompanııasy óziniń xAI jasandy ıntellekt kompanııasyn satyp aldy, dep habarlaıdy TASS. 

— SpaceX resmı túrde xAI-dy satyp aldy, — delingen kompanııanyń baspasóz habarlamasynda.

Qujatta jasandy ıntellekt jasaý kóp energııa qajet etetini jáne muny Jerde qorshaǵan ortaǵa zııan keltirmeı isteý úshin resýrs jetkiliksiz ekeni aıtylǵan.

Birigý bolashaq jasandy ıntellekt derekter ortalyqtarynyń ǵaryshta ornalasýyna múmkindik beredi, onda olar tolyǵymen kún energııasymen jumys isteı alady.

Bloomberg agenttiginiń málimeti boıynsha, birikken kompanııa aktsııalarynyń árqaısysy shamamen 527 dollarǵa baǵalanady, jalpy baǵasy 1,25 trıllıon dollar.

Ótken aptada SpaceX kompanııasynyń Tesla kompanııasymen birigýdi nemese Masktyń jasandy ıntellekt kompanııasy xAI-men balama kelisimshart jasaýdy qarastyryp jatqany habarlandy.

Onyń josparyna sáıkes, kompanııa shamamen 1,5 trıllıon dollarlyq baǵamen 50 mıllıard dollarǵa deıin qarajat jınaı alady, bul tarıhtaǵy eń iri IPO bolady.

Kásipker SpaceX pen xAI kompanııalarynyń birigýi zymyrandardy, spýtnıktik baılanysty, jasandy ıntellekt pen ǵaryshtyq derekterdi óńdeý ınfraqurylymyn biriktiretin ıntegratsııalanǵan ınnovatsııalyq keshen quraıdy dep sanaıdy. xAI buryn Maskqa tıesili X áleýmettik platformasymen biriktirilgen bolatyn.

Aıta keteıik, amerıkalyq mıllıarder jasandy ıntellekt bes jyl ishinde adamnyń ujymdyq ıntellektisinen asyp túsedi dep boljaǵan.