Ilon Mask Pentagonnyń jańa jobasyna qosylady
ASTANA. KAZINFORM — Ilon Mask Donald Tramp ákimshiligimen qaıtadan yntymaqtastyq ornatpaq. Ol Pentagonnyń «Merıdıan» atty jańa jobasyna Palmer Lakı jáne Nıýt Gıngrıchpen birge teń tóraǵalyq etedi. Bul týraly AQSh Qorǵanys mınıstri Pıt Hegset málimdedi, dep habarlaıdy Axios.
Joba 4 aıǵa josparlanǵan. Onyń qatysýshylary qarý-jaraq pen áskerı tehnologııalardy damytýdyń perspektıvaly baǵyttaryn zerttep, bolashaqta AQSh Qarýly kúshterine qandaı múmkindikter qajet bolýy múmkin ekenin anyqtaıdy.
Hegsettiń aıtýynsha, joba aıasynda jańa saıası qujattar ázirlenbeıdi. Negizgi nazar Pentagon ıgerýi qajet perspektıvaly baǵyttar men tehnologııalardy zertteýge aýdarylady.
Mınıstrdiń sózinshe, jobaǵa tehnologııa salasynyń, bıznes pen ǵylymı qaýymdastyqtyń ókilderi, sondaı-aq ulttyq qaýipsizdik salasyndaǵy sarapshylar tartylady. Jobany AQSh Qorǵanys mınıstriniń zertteýler men ázirlemeler jónindegi orynbasary Emıl Maıkl basqarady.
Hegset Pentagon áskerı vedomstvodan tys jerde jumys isteıtin mamandardyń tájirıbesin tehnologııalardyń damý perspektıvalaryn baǵalaýda paıdalanýdy josparlap otyrǵanyn atap ótti.
Palmer Lakıdiń aıtýynsha, jobaǵa qatysýshylar qazirgi qaqtyǵystardy ǵana emes, aldaǵy ondaǵan jyldarǵa arnalǵan yqtımal stsenarıılerdi de qarastyrady. Atap aıtqanda, olar AQSh qandaı tehnologııalar men múmkindikterdi qazirden bastap damytýy kerektigin baǵalaıdy.
Tórt aıǵa sozylatyn jumys qorytyndysy boıynsha top perspektıvaly tehnologııalardy ázirleý, synaqtan ótkizý jáne qoldanysqa engizý jónindegi qorytyndylary men usynystaryn usynýy tıis.
Buǵan deıin Pentagon ár besinshi general men admıraldy qysqartatyny týraly habarlaǵan bolatynbyz.
