Ilon Mask pen Sem Altman qýatty JI júıelerin ázirleýdi baıaýlatýdy qoldady
ASTANA. KAZINFORM — Ilon Mask pen OpenAI basshysy Sem Altman Anthropic kompanııasynyń bas dırektory Darıo Amodeıdiń jasandy ıntellektiniń eń qýatty júıelerin ázirleý qarqynyn báseńdetý týraly usynysyn qoldady. Bul usynys JI júıeleriniń qaýipsizdigine qatysty alańdaýshylyqtyń kúsheıýine baılanysty aıtyldy, dep habarlaıdy Reuters.
Amodeıdiń aıtýynsha, ozyq JI modelderiniń múmkindikteri baqylaý men qaýipsizdik tetikterine qaraǵanda jyldamyraq damyp jatyr. Onyń baǵalaýynsha, aldaǵy 6-12 aıdyń ózinde mundaı júıeler aýqymdy kıbershabýyldar jasaýǵa múmkindik beretin qabiletterge ıe bolýy yqtımal. Mundaı shabýyldar kóptegen avtonomdy JI agentterin paıdalaný arqyly júzege asýy múmkin.
Ol ázirleýshilerge qosymsha bir-eki jyl ýaqyt berilse, senimdi baqylaý tetikterin qalyptastyryp, JI-ge baılanysty táýekelderdi azaıtýǵa múmkindik artatynyn atap ótti.
Darıo Amodeı úsh negizgi baǵytty usyndy. Olar — iri JI kompanııalaryna turaqty ári táýelsiz aýdıt júrgizý, jetekshi ázirleýshilerdiń qaýipsizdiktiń ortaq standarttaryn ázirleýi jáne naryqtaǵy jekelegen kompanııalarǵa básekelestik artyqshylyq bermeı, JI ázirleý qarqynyn birlesip báseńdetýge múmkindik beretin halyqaralyq kelisimder jasaý.
Bul ustanymdy qoldaǵandardyń biri Ilon Mask boldy. Keıin OpenAI basshysy Sem Altman da ozyq modelderdi ázirleý qarqynyn báseńdetý máselesin talqylaýǵa daıyn ekenin málimdedi.
Reuters agenttiginiń habarlaýynsha, Altman kompanııa qyzmetkerlerine OpenAI barǵan saıyn qýatty JI júıeleriniń qaýipsizdigine qatysty alańdaýshylyq kúsheıgen jaǵdaıda olardy ázirleý qarqynyn tómendetý múmkindigin qarastyrýǵa daıyn ekenin aıtqan.
OpenAI buǵan deıin de jańa modelderdi ázirleý jyldamdyǵy olardyń qorǵanys, monıtorıng jáne baqylaý deńgeıine saı bolýy kerektigin málimdegen. Kompanııanyń aıtýynsha, ozyq JI júıeleriniń múmkindikteri tez damyp jatqandyqtan, olardyń qaýipsizdigin qamtamasyz etetin tetikter de odan ozyq qarqynmen jetilýi qajet.
Bul máselege OpenAI kompanııasynyń jazda júrgizgen ishki synaqtary kezinde bolǵan oqıǵa da nazar aýdartty. Testileý barysynda JI agentteri oqshaýlanǵan ortadaǵy shekteýlerdi aınalyp ótip, ınternetke qosylyp, OpenAI-diń jekelegen júıeleri men Hugging Face platformasyna kirgen. Keıin OpenAI bul jaǵdaıdy avtonomdy agentterdiń qorǵanys sharalary jetkiliksiz bolǵan kezdegi múmkindikterin kórsetetin mańyzdy eskertý dep baǵalady.
Buǵan deıin Anthropic kompanııasynyń zertteýshisi Djeıkob Kokson jasandy ıntellektini damytý jarysy jaýapsyz sıpat alyp bara jatqanyn aıtyp, bul tehnologııa bolashaqta adamzattyń joıylýyna ákelýi múmkin ekenin eskertti.
