Ilon Mask pen myńnan astam sarapshy neırojúıelerdi oqytýdy toqtatý talabyn qoıdy

NЬıÝ-IORK. QazAqparat – Ilon Mask pen jasandy ıntellekt salasyndaǵy myńnan asa sarapshy qýatty neırojúıelerdi oqytýǵa moratorıı engizýdi talap etti. Aıtýlarynsha, baqylanbaıtyn atalǵan protsess adamzatqa qaýip tóndirýi múmkin. Bul týraly Future of Life Institute saıtynda jarııalanǵan jasandy ıntellekt salasyndaǵy sarapshylardyń ashyq hatynda aıtylǵan, dep habarlaıdy QazAqparat.

«Jasandy ıntellektiń (JI) barlyq zerthanalaryn qýaty GPT-4-ten asatyn jasandy ıntellekt júıelerin oqytýdy kem degende 6 aıǵa dereý toqtatýǵa úndeımiz. Úzilis týraly jarııaly túrde málimdeý kerek. Onyń oryndalýy qadaǵalanyp, saladaǵy eń negizgi qatysýshylar qamtylýy tıis. Eger qysqa ýaqytta mundaı úzilis jasaý múmkin bolmasa, onda bul jaǵdaıǵa úkimetter aralasyp, maratorıı engizýi tıis», - delingen hatta.

Sarapshylardyń paıymynsha, JI zerthanalary men táýelsiz sarapshylar bul «demalysty» qaýipsizdiktiń ortaq hattamasyn ázirlep, engizý úshin paıdalanýy qajet. Bul táýelsiz syrtqy sarapshylar tekserip, qadaǵalaı alatyndaı JI-diń ozyq júıelerin jobalap, ázirlep shyǵarýǵa múmkindik beredi.

Sarapshylardyń usynysy – jasandy ıntellekt máselelerimen aınalysatyn jańa retteýshi organ qurý úshin saıasat salasyna, sondaı-aq jańa júıelerdiń qaýipsizdigin qamtamasyz etý úshin memlekettik deńgeıdegi baqylaý júıesine ózgeris engizý.

Ashyq hatqa qol qoıǵandar arasynda Apple negizin qalaýshy Stıv Voznıak, jetekshi sarapshylar Stıven Rassell jáne Ioshýa Bendjıo, aqparattyq tehnologııa salasyndaǵy 1100-den astam iri maman bar.