Ilon Mask Qazaqstandaǵy qutqarý operatsııasyna nazar aýdardy

ASTANA. KAZINFORM – Ilon Mask Shyǵys Qazaqstan oblysynda qar qursaýynda qalǵan bes adamdy qutqarý sátinen túsirilgen beınejazbamen X áleýmettik jelisinde bólisti. Jarııalanym 2,3 mıllıonnan astam qaralym jınady.

qutqarýshylar
Foto: QR TJM baspasóz qyzmeti

Ilon Mask beınejazbaǵa «Starlink ómirdi qutqarady» dep jazǵan.

v
Áleýmettik jeliden alynǵan skrın

Oqıǵa qazan aıynda Shyǵys Qazaqstan oblysynyń Kúrshim aýdanynda bolǵan. Jol talǵamaıtyn kóligi buzylǵan bes adam qar qursaýynda qalyp qoıǵan.

Uıaly baılanys bolmaǵandyqtan, azamattar Starlink spýtnıktik baılanys júıesi arqyly kómek surap, dabyl belgisin bergen.

TJM qutqarýshylary «Trekol» jol talǵamaıtyn kóligimen shamamen 100 shaqyrym jol júrip, bes adamdy qaýipsiz jerge jetkizdi.

– 2025 jyldyń sońynan bastap Qazaqstan TJM pılottyq joba aıasynda Starlink spýtnıktik baılanys júıesin engizýde. 2026 jyly mınıstrlik bólimsheleriniń ıeliginde 100-den astam termınal bar. Olar komandalyq-shtabtyq mashınalarǵa, baılanys jáne jedel áreket etý avtokólikterine ornatylǵan. Bul jabdyq mobıldi baılanys joq aýmaqtarda koordınattardy jiberýge, jedel aqparat almasýǵa jáne izdestirý toptarymen turaqty baılanys ornatýǵa múmkindik beredi, – delingen mınıstrlik aqparatynda.

Starlink júıesi buǵan deıin de joǵalǵan adamdardy izdestirý kezinde qoldanylǵan.

Máselen, 2025 jylǵy jeltoqsanda Aqtóbe oblysynda qutqarýshylar spýtnıktik baılanys, ushqyshsyz ushý apparaty jáne kınologııalyq eseptoptyń kómegimen 41 jastaǵy shopandy izdegen. Er adam Shubarqudyq aýylynan 30 shaqyrym jerde tiri tabylǵan.

Al 2026 jylǵy shildede Jambyl oblysynda Starlink pen ushqyshsyz ushý apparattaryn paıdalaný nátıjesinde 19 jastaǵy shopan Kókbastaý jaıylymynan 15 shaqyrym jerde tabyldy.

Qazirgi ýaqytta Qazaqstannyń Tótenshe jaǵdaılar mınıstrligi Starlink jabdyǵyn óndirýshi SpaceX kompanııasymen spýtnıktik baılanysty qoldaný aıasyn keńeıtý boıynsha jumys júrgizip jatyr.

Mınıstrliktiń negizgi maqsaty – eldiń shalǵaı jáne jetý qıyn aýmaqtarynda turaqty baılanysty qamtamasyz etý.

Aıta keteıik, buǵan deıin Almatyda uıaly baılanys pen ınternet bolmaǵan jaǵdaıda da joǵalǵan adamnyń ornalasqan jerin anyqtaýǵa múmkindik beretin qutqarý júıesi ázirlengen bolatyn. Júıe SOS sıgnaly arqyly adamnyń koordınattaryn qutqarý qyzmetine jetkizedi.