Ilon Mask qaıtadan trıllıoner atandy
ASTANA. KAZINFORM — Tesla men SpaceX aktsııalarynyń qymbattaýynan keıin Ilon Mask qaıtadan trıllıoner atandy. Onyń baılyǵy birneshe kún ishinde 30,6 mlrd dollarǵa ósti, dep habarlaıdy Kazinform agenttigi TASS-qa silteme jasap.
Forbes jýrnalynyń málimetinshe, 5 qazanda saýda-sattyq ashylǵannan keıin Tesla men SpaceX aktsııalarynyń ósýi Masktiń baılyǵyn qaıtadan 1 trln dollardan asyrǵan.
Basylymnyń baǵalaýynsha, Masktiń baılyǵy 1 trln dollarǵa jetip, 2 qazanmen salystyrǵanda 30,6 mlrd dollarǵa artqan. Ol álemdegi eń baı adam mártebesin saqtap otyr. Ekinshi orynda turǵan Djeff Bezostyń baılyǵy 371,5 mlrd dollarǵa baǵalanady.
Mask alǵash ret maýsym aıynda SpaceX-tiń Nasdaq bırjasyna shyǵýynan keıin trıllıoner atanǵan. Alaıda birneshe kúnnen soń SpaceX pen Tesla aktsııalarynyń arzandaýyna baılanysty bul mártebesinen aıyrylǵan. Sońǵy kúnderi eki kompanııanyń da aktsııalary qymbattap, kásipkerdiń baılyǵy qaıtadan 1 trln dollar mejesine jaqyndady. Tek 2 qazanda Tesla-nyń úshinshi toqsandaǵy kólik jetkizilimi sarapshylar kútkennen joǵary bolǵannan keıin Masktiń baılyǵy 61 mlrd dollarǵa artqan.
5 qazan tańerteń Tesla aktsııalary 1 paıyzdan astam, al SpaceX aktsııalary 5 paıyzdan astam qymbattap, bir aktsııanyń baǵasy 167 dollarǵa jetti.
SpaceX aktsııalarynyń ósýine Morgan Stanley sarapshylarynyń kompanııa baǵaly qaǵazdaryn tómen baǵalanǵan dep esepteýi, sondaı-aq ótken aptada Starship kemesiniń orbıtaǵa alǵash ret sátti shyǵarylýy áser etti.
Buǵan deıin Mask rekordtyq kórsetkishke jetkennen keıin eki apta ótpeı jatyp trıllıoner mártebesinen aıyrylǵan edi. Onyń aktıvteriniń quny tómendeı bastaǵan. 24 maýsymda kásipkerdiń kapıtaly 957 mlrd dollarǵa baǵalanyp, ol trıllıoner mártebesin joǵaltqan.
Sonymen qatar Ilon Mask Tramptyń «sýperıntellekt» týraly málimdemesinen keıin SpaceXAI ataýyn ózgertetini belgili boldy.
