Ilon Mask Grok jasandy ıntellekt modeline jalańash fotolarǵa qatysty eskertý jasady

ASTANA. KAZINFORM – X platformasy Grok jasandy ıntellekt modeline shekteýler jarııalady. Dálirek aıtqanda naqty adamdardy jalańash etip óńdeýge tyıym saldy, dep habarlady BBC.

Bul sheshim Ulybrıtanııa men AQSh-ty qosa alǵanda, birneshe elde jasandy ıntellekt arqyly óńdelgen jynystyq sıpattaǵy sýretterdiń taralýynan qoǵamdyq jáne saıası narazylyqtar týyndaýyna baılanysty qabyldandy.

X-tiń málimetinshe, shynaıy adamdardyń fotosýretterin ashyq kıimmen, sonyń ishinde shomylý kıimderimen sýretter daıyndaý kezinde óńdeýge jol bermeý úshin tehnologııalyq sharalar engizildi. 

Shekteý Kalıfornııanyń Bas prokýrory Rob Bonta balalar beınelengen seksýaldy jasandy ıntellekt sýretterin taratýǵa qatysty tergeý jarııalaǵannan keıin kóp uzamaı jasaldy. Onyń aıtýynsha, mundaı kontent onlaın qýdalaý jáne qysym kórsetý úshin paıdalanylǵan.

X Grok kómegimen ish kıimmen nemese shomylý kıimderimen naqty adamdardyń sýretterin jasaýǵa tyrysatyn paıdalanýshylar óz eliniń zańdaryna sáıkes avtomatty túrde buǵattalatynyn málimdedi. Kompanııa sonymen qatar Grok kómegimen keskindi óńdeý múmkindigi tek aqyly akkaýnttar úshin ǵana qoljetimdi bolatynyn málimdedi.

Janjal AQSh-tan tys jerlerge de taraldy. Malaızııa men Indonezııa Grok chatbotyna kirýdi buǵattady, al Ulybrıtanııa premer-mınıstri Kır Starmer X kompanııasy olqylyqtardy rettemese, «ózin-ózi retteý quqyǵynan» aıyrylýy múmkin ekenin aıtty.

Buǵan deıin Jetisýda JI arqyly jalǵan chek jasaǵan kámeletke tolmaǵandar toby áshkerelengen edi.