Ilon Mask endi álemdegi eń baı adam emes
ASTANA. QazAqparat - Tesla jáne SpaceX negizin qalaýshy Ilon Mask álemdegi eń baı adamdar tizimindegi birinshi orynnan tómendep qaldy. Forbes jáne Bloomberg málimetinshe, endi ǵalamshardaǵy eń baı adamdar tiziminde LVMH lıýks taýarlar kompanııasynyń basshysy Bernar Arno tur. Bul týraly QazAqparat VVS aqparat agenttigine silteme jasap habarlaıdy.
Forbes málimetinshe, Masktiń dáýleti qazir 178 mlrd dollardy quraıdy. BAQ elektromobıl óndirýshisi Tesla-nyń shamamen 14%-na ıe ekenin jáne qazan aıynda Twitter-di 44 mlrd dollarǵa satyp aldy dep baǵalap otyr.
Bul rette Arnonyń jalpy baılyǵy 188 mlrd dollardy qurady.
LVMH - frantsýzdyq sándi buıymdar konglomeraty. Kompanııa 1987 jyly Louis Vuitton jáne Moët Hennessy sán úıleriniń birigýi nátıjesinde quryldy. Qazirgi ýaqytta ol 75 lıýks brendin biriktirip otyr. 2021 jyly LVMH Eýropadaǵy eń qundy kompanııa bolyp tanyldy. Kásipkerlikti Arnonyń otbasy basqaryp keledi.
Mask Forbes jýrnalynyń mıllıarderler tiziminde alǵash ret 2021 jyldyń kókteminde birinshi turdy. Sol kezde onyń taza dáýleti 219 mlrd dollarǵa jetip, Amazon negizin qalaýshy Djeff Bezosty kóshbasshylyqtan yǵystyryp jiberdi.
Ol kezde frantsýz kásipkeri Bernar Arno úshinshi orynda bolatyn. Ol úzdik «úshtikke» alǵash ret 2020 jyly engen. Sodan beri Arno otbasynyń baılyǵy, Forbes málimeti boıynsha, eki eseden astam – 76 mlrd-tan 158 mlrd dollarǵa deıin ósti.
Foto: REUTERS
