Ilon Mask Donald Tramptyń Twitter-akkaýntyn bloktan shyǵardy
ASTANA. QazAqparat - Amerıkalyq kásipker Ilon Mask Amerıkanyń eks-prezıdenti Donald Tramptyń Twitter-degi akkaýntyn bloktan shyǵardy, dep habarlaıdy QazAqparat.
Keshe I.Mask Twitter-degi jeke paraqshasynda saýalnama bastaǵan bolatyn. Ol: «Burynǵy prezıdent Trampty qaıtarý», - dep jazyp, tańdaýǵa eki nusqany usyndy: «ıá» nemese «joq». Daýys berý 24 saǵatqa jalǵasty. Bir táýlikte 15 mıllıonnan sál astam adam tańdaý jasady. Olardyń 51,8% protsenti Tramp akkaýntyn qaıtarýdy qoldasa, 48,2% qarsy ekenin bildirdi.
Ilon Mask saýalnama nátıjesin Twitter-de jarııalady. Jazýynsha, saýalnamany 134 mln adam oqyǵan.
Eske salaıyq, 2021 jyldyń qańtarynda Twitter áleýmettik jelisi AQSh-tyń sol kezdegi prezıdenti Donald Tramptyń akkaýntyn birjolata bloktap tastaǵan bolatyn.
Tramp el basshysy laýazymynda 26 myńnan astam tvıt jarııalaǵan. Kúnine orta eseppen 18 tvıt jazyp otyrǵan.
Ilon Mask bıylǵy qazan aıynyń sońynda Twitter-di 44 mıllıard dollarǵa satyp alǵan edi.
