Ilon Mask ár balaǵa SpaceX aktsııalaryn taratpaq
ASTANA. KAZINFORM — Ilon Mask áleýmettik jelide óz kompanııalarynyń aktıvterin balalarǵa úlestirip bermek oıy baryn málimdedi, dep habarlaıdy Kazinform agenttiginiń Vashıngtondaǵy menshikti tilshisi.
— Kelesi jyly Amerıkadaǵy ár balaǵa bir-birden SpaceX aktsııalaryn taratamyn, — dep jarııazdy Ilon Mask X paraqshasynda.
Onyń aıtýynsha, bul kóptegen qaıyrymdylyq aktsııalarynyń alǵashqysy bolady.
New York Post basylymynyń jazýynsha, Mask aktsııalardy qalaı taratýdy josparlap otyrǵanyn aıtpaǵan. Biraq ol qarajatty «Tramptyń shotyna» (Trump Accounts), ıaǵnı Aq úıdiń balalarǵa arnalǵan salyq jeńildikteri bar jańa ınvestıtsııalyq shottaryna aýdarýy múmkin.
Bul shottar 2025 jyldyń qańtary men 2028 jyldyń sońy aralyǵynda AQSh-ta týylǵan balalarǵa arnalǵan.
Qazirgi ýaqytta baǵdarlama shamamen 70 mıllıon balany qamtıdy. Aq úı osy aıdyń basynda qarjy mınıstri Skott Bessent, salyq basqarmasynyń bas dırektory Frenk Bızınıano, fılantroptar, Dell Technologies basshylary Maıkl jáne Sıýzan Dell, sondaı-aq Altimeter Capital ınvestıtsııalyq fırmasynyń negizin qalaýshy jáne bas dırektory Bred Gerstner salyqtan bosatylǵan baǵdarlamaǵa «tarıhı úles» qosqanyn jarııalady.
Buǵan deıin Ilon Masktyń respýblıkashyldardyń Senattaǵy jeńisin qoldaý úshin 158 mıllıon dollar qaıyrymdylyq jasaǵany týraly habarlanǵan bolatyn.
Ilon Mask Tramptyń «sýperıntellekt» týraly málimdemesinen keıin SpaceXAI ataýyn ózgertedi.
