Ilon Mask álemdegi alǵashqy trıllıoner atandy
ASTANA. KAZINFORM — SpaceX kompanııasynyń aktsııalaryn satýdan 75 mlrd dollar tartylýy Ilon Masktiń baılyǵyn kúrt ósirdi. Sonyń nátıjesinde onyń negizgi aktıviniń quny artyp, jalpy dáýleti 1 trıllıon dollardan asty, dep habarlaıdy Reuters.
Zymyrandar, spýtnıktik júıeler jáne jasandy ıntellekt salasymen aınalysatyn SpaceX aktsııalaryn satýdan 75 mlrd dollar ınvestıtsııa tartty. Bul ınvestorlardyń Masktyń bıznes-jobalaryna degen joǵary qyzyǵýshylyǵyn kórsetti.
Aktsııalar ornalastyrylǵanǵa deıin Forbes Masktiń baılyǵyn shamamen 780 mlrd dollar dep baǵalaǵan. Alaıda SpaceX-tiń quny qaıta eseptelip, aktsııalary saýdaǵa shyqqannan keıin onyń dáýleti 1,1 trıllıon dollardan asty.
Mask baılyǵynyń negizgi bóligi SpaceX-tegi úlesine tıesili. Kompanııadaǵy onyń úlesiniń quny shamamen 866 mlrd dollarǵa baǵalanady. Sonymen qatar, onyń aktıvteriniń eleýli bóligin Tesla aktsııalary men basqa da ınvestıtsııalary quraıdy.
Kásipkerdiń esimi 2022 jyly X (burynǵy Twitter) áleýmettik jelisin 44 mlrd dollarǵa satyp alǵannan keıin de jıi talqylana bastady. Bul mámile onyń qoǵamdyq jáne saıası yqpalyn aıtarlyqtaı kúsheıtti.
Sarapshylar Tesla-nyń jetistigin álemdik avtokólik ındýstrııasynyń elektromobılderge kóshýin jedeldetken negizgi faktorlardyń biri dep sanaıdy. Qazir kompanııanyń naryqtyq quny 1 trıllıon dollardan asady.
Ońtústik Afrıkanyń Pretorııa qalasynda dúnıege kelgen Mask Pensılvanııa ýnıversıtetin támamdaǵan. Keıin ol ǵarysh tehnologııalary, elektromobılder, jasandy ıntellekt jáne tsıfrlyq platformalardy qamtıtyn iri bıznes-ımperııa qurdy.
Eske sala keteıik, Ilon Masktyń zymyrany Tehastaǵy Starbase ǵarysh aılaǵynan ushpaı qaldy.
