Іlııas Jansúgirovtiń uly professor atandy

TALDYQORǴAN. QazAqparat - Іlııas Jansúgirovtiń uly Saıat Jansúgirovke «Qurmetti professor» ataǵy berildi. Sonymen qatar Іlııas Jansúgirov murasyn zertteýge zor úles qosqany ári ǵylym salasyndaǵy úzdik jetistikteri úshin «Іlııas Jansúgirov» tósbelgisi tabys etiledi, dep habarlaıdy QazAqparat tilshisi.

Atalǵan qurmet Saıat Jansúgirovke Taldyqorǵanda kórsetildi. Qazir Іlııas Jansúgirov atyndaǵy Jetisý memlekettik ýnıversıtetinde respýblıkalyq  ǵylymı-tájirıbelik konferentsııa ótip jatyr. «Jansúgirov taǵylymy» atty aýqymdy shara aldymen jyr qulageri, aqyn, jazýshynyń eskertkishine gúl shoqtaryn qoıýdan bastaldy. Odan keıin qonaqtar «Іlııas murasy» atty kórmeni tamashalady. Jıynǵa  100-den asa  adam qatysýda. Konferentsııa jumysyna shamamen 100 adam ǵylymı maqalalaryn usynǵan.

Aıtýly shara  El Táýelsizdiginiń  25 jyldyǵy men  Jeltoqsan oqıǵasyna 30 jyl tolýyna oraı uıymdastyrylyp otyr. Basqosýda elimizge tanymal ǵylym doktorlary men professorlar, ýnıversıtettiń oqytýshylary  baıandama jasaıdy. Ol jerde qamtylatyn taqyryptar:  «Jetisý óńiri jáne 1916 jylǵy ult-azattyq kóterilis: tarıhy men taǵylymy», «Zamanaýı talaptar men balamaly bilim baǵdarlamasy negizinde bilim berý júıesiniń úzdiksizdigi men sabaqtastyǵyn qamtamasyz etý», «Zamanaýı joǵary bilim berý júıesindegi oqý-tárbıe úrdisiniń tájirıbelik jáne gýmanıstik negizderi», «Jaratylystaný-tehnıkalyq ǵylymdar, Zamanaýı qoǵamdaǵy ekonomıkalyq jáne quqyqtyq qatynastar».