Іlııas Jansúgirovtiń «Qulager» poemasy nemis tiline aýdaryldy
ASTANA. QazAqparat - Bıyl nemis tilindegi baı ádebı qor qazaq aqyny Іlııas Jansúgirovtiń «Qulager» poemasymen tolyqty, dep habarlady «Ádebıet» portaly.
Poema nemis tiline qazaqsha túpnusqasynan tikeleı aýdarylyp, Qazaqstan-Gete ınstıtýtynyń qoldaýymen «Büchergilde» (Germanııa) baspasynda basylyp shyqty.
Poemanyń nemis tilindegi nusqasynyń avtory - nemis jazýshysy Gert Haıdenraıh.
Qazaq halqynyń mádenıeti men ónerin, tarıhy men salt-dástúrin nemis tildi oqyrmandarǵa keńinen tanystyratyn «Qulager» poemasynyń alǵashqy tusaýkeseri bıylǵy naýryz aıynda Leıptsıg qalasynda kezekti halyqaralyq kitap jármeńkesinde (Leipziger Buchmesse) ótken edi.
2016 jyldyń 25 - 27 mamyr kúnderi «Qulagerdiń» nemis tilindegi aýdarmasynyń tusaýkeseri Astana men Almaty qalalarynda da ótedi dep josparlanǵan.
Atalǵan sharaǵa osy jobaǵa qatysqan aýdarmashylar men Іlııas Jansúgirovtiń qyzy - Ilfa Іlııasqyzy arnaıy shaqyrylyp otyr.
Aýdarmanyń tusaýkeserin tanymal telejúrgizýshi, aqyn Jańyl Asylbekova júrgizedi.
