Ilham Álıev Túrki memleketteriniń qorǵanys salasyndaǵy yntymaqtastyǵyn nyǵaıtýǵa shaqyrdy
Aqordada ótip jatqan Túrki memleketteri uıymynyń H sammıtinde Ázerbaıjan Prezıdenti Ilham Álıev Túrki memleketteriniń qorǵanys salasyndaǵy yntymaqtastyǵyn nyǵaıtýǵa úndedi, dep habarlaıdy Kazinform.
«Ókinishke qaraı, qazirgi kezde halyqaralyq quqyq normalary buzylyp jatyr. Álemniń túkpir-túkpirinde qarýly qaqtyǵystar, qantógister men soǵystar oryn alý ústinde. Osy oraıda ár eldiń qorǵanys múmkindigi onyń qaýipsizdiginiń negizgi kepili sanalady. Sondyqtan meniń oıymsha, uıymǵa múshe memleketterdiń qorǵanys, qaýipsizdikti saqtaý, ónerkásip aıasyndaǵy yntymaqtastyǵy nyǵaıtyla túsýi tıis», - dedi Ázerbaıjan Prezıdenti.
Osy rette Ilham Álıev Armenııa 30 jyl boıy Ázerbaıjan aýmaǵyn okýpatsııalap kelgendigine nazar aýdartty.
«Ol jerde zańsyz «qýyrshaq» rejım ornatty. Etnıkalyq tazartý júrgizip, óńirden mıllıonnan astam ázerjaıjandyq atamekeninen qýdalandy. Qalalarymyz ben aýyldarymyzdy jermen-jeksen etti. Mádenı jáne dinı nysandarymyzdy buzdy. Jyldar boıy Ázerbaıjan bul qaqtyǵysty beıbit jolmen sheshýge umtyldy. Degenmen, Armenııa mártebesin saqtap qalýǵa tyrysty. Ázerbaıjan ózin qorǵaý quqyǵyn paıdalana otyryp, BUU jarǵysynyń 51-babyna sáıkes Armenııany tize búktirdi. Osylaısha tarıhı ádilettilikti jáne óziniń aýmaqtyq tutastyǵyn qalpyna keltirdi», - dedi ol.
