Ilham Álıev: TMU-nyń álemdik saıasattaǵy róli kúsheıip keledi
ASTANA.KAZINFORM — Ázerbaıjan Prezıdenti Túrkistanda ótip jatqan beıresmı sammıtte Túrki memleketteri uıymynyń halyqaralyq yqpaly artyp kele jatqanyn málimdedi.
— Búginde uıymnyń halyqaralyq arenadaǵy salmaǵy jáne jahandyq úderisterdegi róli nyǵaıyp keledi, — dedi ol.
Álıevtiń sózinshe, beıresmı kezdesýler tıimdiligin kórsetti, ıaǵnı memleketter arasyndaǵy ózara úılesimge oń áser etip jatyr. Uıym túrki memleketteriniń saıası, ekonomıkalyq qarym-qatynasynda mańyzdy alańǵa aınaldy.
Sonymen qatar, ol túrki elderi tsıfrlandyrý jáne JI salasynda jahandaǵy kóshbasshy memleketterdiń qatarynda bolýy kerek ekenin atap ótti.
— Álem tsıfrlyq damý men jasandy ıntellektiniń jańa kezeńine qadam basty. Túrki elderi bul úderistiń eń aldynda bolýy tıis, — dedi Ilham Álıev.
Onyń sózinshe, Ázerbaıjanda bul baǵytta aıtarlyqtaı jumys atqarylyp jatyr. Máselen, Tsıfrlyq damý keńesi, Ulttyq jasandy ıntellekt ortalyǵy jáne Jasandy ıntellekt akademııasy qurylǵan. Sonymen birge, tehnologııalardy damytý boıynsha strategııa qabyldanǵan. Innovatsııalyq sheshimderdi memlekettik basqarýǵa engizýge de basa mán berilýde.
Odan bólek, Álıev túrki keńistiginde tsıfrlyq ıntegratsııany, sonyń ishinde «Tsıfrlyq Jibek joly» jobasyn júzege asyrýǵa shaqyrdy.
Sonymen qatar, Orta dáliz aıasynda Eýropa men Azııa arasyndaǵy kólik baılanysyn damytýdyń ózektiligine toqtaldy. Óıtkeni, ol aımaqtyń strategııalyq mańyzyn arttyrady.
Aıta keteıik, buǵan deıin Ilham Álıev Qazaqstan men Ázerbaıjannyń strategııalyq baılanysy jóninde málimdeme jasaǵanyn jazǵanbyz.
