Ilham Álıev Ortalyq Azııa memleketteri basshylarynyń VI konsýltatıvtik kezdesýine qatysý úshin Astanaǵa keldi

ASTANA. KAZINFORM – Ázerbaıjan Prezıdenti Ilham Álıev Ortalyq Azııa memleketteri basshylarynyń VI konsýltatıvtik kezdesýine qatysý úshin Astanaǵa keldi. Qazaqstan Premer-Mınıstri Oljas Bektenov Ilham Álıevti elorda áýejaıynda kútip aldy, dep habarlaıdy Úkimettiń baspasóz qyzmeti.

Baspasóz málimetterine qaraǵanda, Qazaqstan men Ázerbaıjan arasyndaǵy ekijaqty qatynastar saýda-ekonomıkalyq jáne mádenı-gýmanıtarlyq ózara is-qımyldyń barlyq spektri boıynsha damyp keledi. Ótken jyldyń qorytyndysy boıynsha Qazaqstan men Ázerbaıjan arasyndaǵy taýar aınalymy 14,3%-ǵa artyp, $529,4 mln-dy qurady, bıylǵy qańtar-maýsym aılarynda $280,6 mln-ǵa jetti.

Úkimetter munaı-gaz, kólik-logıstıka, tsıfrlyq kommýnıkatsııa jáne ǵarysh ónerkásibi salalarynda birlesken jobalardy iske asyryp keledi. Onyń ishinde Transkaspıı halyqaralyq kólik baǵyty sheńberinde Kaspıı teńiziniń túbimen optıkalyq-talshyqty baılanys jelisin jáne tereń sý elektr kabelin tartý jobalary bar. Sondaı-aq ekijaqty yntymaqtastyq áleýetin ashý maqsatynda birlesken tikeleı ınvestıtsııa qory quryldy.

Anyqtama:

Aımaqtyq yntymaqtastyqty tereńdetý men keńeıtýge baǵyttalǵan Ortalyq Azııa memleketteri basshylarynyń konsýltatıvtik kezdesýleri 2018 jyldan beri ótkizilip keledi. Sońǵy bes jylda (2018-2023 jyldar) ózara saýda kólemi $5,7 mlrd-tan $11 mlrd-qa deıin ósti. Qazaqstannyń OA elderimen saýda-sattyq kólemi ótken jyly 26,8%-ǵa ósip, $8 mlrd-qa jetti.