Ilham Álıev Qazaqstan men Ázerbaıjannyń strategııalyq baılanysy jóninde málimdeme jasady
ASTANA.KAZINFORM – Qos memlekettiń odaqtastyq qatynastary kúsheıip keledi. Bul jóninde Ázerbaıjan Prezıdenti Ilham Álıev Túrki memleketteri uıymynyń Túrkistanda ótip jatqan beıresmı sammıtinde málimdedi.
Ol Qasym-Jomart Toqaevqa jyly qarsy alǵany jáne qonaqjaılyǵy úshin alǵys aıtty. Sondaı-aq, ekijaqty baılanysty nyǵaıtýdaǵy Túrkistannyń aıryqsha mańyzyn atap ótti.
– Men kóne ári tarıhy men mádenıeti baı qala Túrkistanǵa kelgenime óte qýanyshtymyn. Túrkistan – Ázerbaıjannyń mádenı astanasy Shýshanyń alǵashqy baýyrlas qalasy. Bizdiń halyqtarymyz sekildi shaharlarymyz da baýyr, – dedi ol.
Sonymen birge, qos memlekettiń strategııalyq yntymaqtastyǵy turaqty túrde damyp kele jatqanyna toqtaldy.
– Bul – meniń Qazaqstanǵa sońǵy bes jyldaǵy segizinshi saparym. Al Prezıdent Toqaev Ázerbaıjanǵa resmı saparmen alty ret keldi. Tórt jyl buryn qol qoıylǵan deklaratsııa bizdiń qarym-qatynasymyzdy odaqtastyq deńgeıine kóterdi, – dedi Ilham Álıev.
Aıta keteıik, buǵan deıin Erdoǵan 34 áripke negizdelgen túrki álipbıin qoldaný aıasyn keńeıtýdi usynǵanyn jazǵanbyz.
