Іlespe gazdy ysyrap etý 8 ese azaıdy – Maǵzum Myrzaǵalıev

NUR-SULTAN. QazAqparat – «Jer qoınaýy jáne jer qoınaýyn paıdalaný týraly» kodekstiń pármenimen elimizde munaı óndirý kezinde ilespe gazdy aýada jaǵý mólsheri keıingi 15 jylda 8 ese azaıdy. Úkimet otyrysynda QR Energetıka mınıstri Maǵzum Myrzaǵalıev osyndaı málimet usyndy, dep habarlaıdy QazAqparat tilshisi.

«Memleket basshysy 2060 jylǵa qaraı kómirtegi beıtaraptyǵyna qol jetkizý jáne Parıj kelisimi sheńberinde alynǵan mindettemelerdiń oryndalýyn qamtamasyz etý mindetin qoıdy.

Bul mindettemeler 2030 jylǵa qaraı parnıktik gazdar shyǵaryndylaryn 1990 jylǵy deńgeıden 15 paıyz qysqartýdy talap etedi.

Budan basqa, Prezıdent óz Joldaýynda 10 lastanǵan qalany gazdandyrý jáne balamaly energııa kózderine kóshirýdi tapsyrǵan bolatyn»,- dedi vedomstvo basshysy.

Onyń aıtýyna qaraǵanda, mınıstrlik osy tapsyrmalardy oryndaý úshin alaýlarda gazdy jaǵýǵa tyıym salý, jumys istep turǵan jylý elektr ortalyqtaryn gazǵa kóshirý, kómir stantsııalarynda eń ozyq qoljetimdi tehnologııalardy engizý, jańartylatyn energııa kózderin damytý sııaqty keshendi sharalar qabyldap jatyr.

«Ekologııalyq jaǵdaıdy jaqsartý úshin Energetıka mınıstrligi zańnama bazasyn jetildirý boıynsha aýqymdy jumys atqardy. «Jer qoınaýy jáne jer qoınaýyn paıdalaný týraly» kodekstiń babymen ilespe jáne tabıǵı gazdardy alaýlarda jaǵýǵa tyıym salynyp otyr.

Sondaı-aq, jer qoınaýyn paıdalanýshylardyń shıki gazdy óńdeýdi damytý baǵdarlamalaryn ázirleý jónindegi mindeti zańnamalyq túrde belgilengen.

Sonyń nátıjesinde alaýlarda jaǵylatyn gaz kólemi 2006 jylmen salystyrǵanda 8 ese azaıdy. 2006 jyly bul kórsetkish 3,1 mlrd tekshe metr bolsa, 2020 jyly 390 mln tekshe metr boldy», - dedi Maǵzum Myrzaǵalıev.