Іle ózeninde móńke men aq amýr balyqtarynyń neden qyrylǵany belgili boldy

NUR-SULTAN. QazAqparat - Almaty oblysynda Іle ózeninde móńke men aq amýr balyqtarynyń qyrylýyna gaz rejıminiń durys bolmaýy sebep. Bul jaıynda Orman sharýashylyǵy jáne janýarlar álemi komıtetinen málim etti, dep habarlaıdy QazAqparat tilshisi.

Vedomstvo málimetinshe, 2020 jyldyń 26 sáýirinde «Almaty oblystyq orman sharýashylyǵy jáne janýarlar álemi aýmaqtyq ıspektsııasy» RMK ınspektorlary Іle ózeninde brakonerlik faktilerdi anyqtaý jáne olardyń jolyn kesýge baǵyttalǵan sholǵyndaý sharalaryn júrgizgen. Reıd barysynda D.Qonaev atyndaǵy kópir aýmaǵynan óli balyqtardy tapqan. Ólgen móńke jáne aq amýr balyqtaryn syrttaı qaraý barysynda olardyń qabyrshaqtarynyń ózgergeni anyqtalǵan. Osydan keıin ınspektorlar barlyq múddeli memlekettik organdarǵa habar berip, 201 keli móńke jáne 152 keli aq amýr balyǵyn jınap alǵan.

Sonymen qatar sýdan jáne balyqtan synama alynyp, «Balyq sharýashylyǵy ǵylymı-óndiristik ortalyǵy» JShS Balqash fılıalyna jiberilgen.

«Balyq sharýashylyǵy ǵylymı-óndiristik ortalyǵy» JShS Balqash fılıaly qorytyndysyna sáıkes, balyqtardyń qyrylýyna arnalardyń ishindegi aǵynnyń bolmaýy, gaz rejıminiń qanaǵattanarlyqsyzdyǵy, ýly hımıkattar sebep bolǵan. Immýnıteti álsiz balyqtar arna ishinde júrgen kezde ólip qalǵan. Keıbir balyq sınergazılezge shaldyqqan», - dep atap ótedi komıtetten.

QR AShM Veterınarlyq baqylaý jáne qadaǵalaý komıtetiniń Almaty oblystyq aýmaqtyq ınspektsııasynyń ınspektorlary balyq pen sý synamasyn zerthanalyq zertteý júrgizý úshin Almaty qalasyna da jibergen. Ulttyq veterınarııa jónindegi referenttik ortalyqtyń Almaty fılıaly qortyndysyna sáıkes, zerttelgen synamalardyń quramynda kadmıı, synap, qorǵasyn, kúshála syndy ýly elementter, tsezıı-137 jáne strontsıı-90 syndy radıonýklıdter deńgeıi shekti normadan aspaǵan.

«Búginde atalǵan ýchaskede balyqtardyń qaıtadan qyrylýy anyqtalǵan joq«, - dedi vedmostvodan.