Іle ózeni boıynda brakonerlikpen aınalysqan Túrkistan turǵyndary ustaldy
TALDYQORǴAN. QazAqparat - Almaty oblysyndaǵy Іle ózeniniń boıynda ustalǵan «VAZ» jánen «Ford» avtokólikterinen iri kólemde aýlanǵan balyqtar men qoldanystaǵy zańnamamen qoldaný tyıym salynǵan elektrli qarmaqtar, toq kózderi, sonymen qatar úrlemeli qaıyqtar tabylyp, tárkilendi, dep habarlaıdy QazAqparat tilshisi.
Panfılov aýdanynyń tártip saqshylary ózge de tabıǵat qorǵaý organdarymen birlese otyryp, arnaıy reıd kezinde tabıǵı baılyqqa qol salǵan brakonerlerdiń isin áshkerelep, QR Qylmystyq kodeksiniń 335-babynyń 3-tarmaǵyna sáıkes qylmystyq is qozǵady.
«Jeńil kólikten 100 kelige jýyq ártúrli balyq tárkilendi. Ekinshi kólikti tekserý kezinde brakonerlikpen aınalysqan azamattar elektr toǵyn paıdalanyp, balyq aýlaǵany belgili boldy. Kúdiktilerdiń balyq aýlaý quraldary tárkilendi jáne sotqa deıingi tergeý aıaqtalǵanǵa deıin kólikteri arnaıy turaqqa qoıyldy»,- dedi Panfılov aýdany PB bastyǵynyń mindetin atqarýshy polıtsııa podpolkovnıgi Rýslan Kerimqulov.
Polıtsııa taratqan aqparat boıynsha qylmysqa qatysy bar kúdiktiler Túrkistan oblysynyń turǵyndary bolyp shyqqan. Tárkilengen balyqtar tıisti qabyldaý oryndaryna ótkizilip, odan túsken qarajat memleket paıdasyna aýdarylady. Al, brakonerler keltirgen materıaldyq shyǵyn kólemi anyqtalýda.
