Іle-Balqash rezervatyndaǵy buǵylarǵa GPRS baýlar taǵyldy
TALDYQORǴAN. QazAqparat - Almaty oblysy aýmaǵyndaǵy Іle-Balqash memlekettik tabıǵı rezervatynda júrgen buǵylardyń moınyna GPRS baýlar taǵyldy. Bul baýlar buǵylardyń qozǵalysyn baqylyp, olardyń jaǵdaıyn bilýge múmkindik beredi, dep habarlaıdy QazAqparat tilshisi.
Іle-Balqash memlekettik tabıǵı rezervaty ótken jyldyń maýsym aıynda ashylǵan bolatyn. Mundaǵy maqsat dál osy aýmaqta kezinde meken etip, joıylyp ketken jolbarystardyń popýlıatsııasyn jandandyrý. 400 myń gektardan astam jer erekshe qorǵalatyn aýmaqqa aınalyp, jolbarystardy 2025 jyly jiberý josparlanyp otyr. Al oǵan deıin jyrtqyshtyń azyqtyq qoryn qamtamasyz etý kerek. Sondyqtan túrli shópqorekti janýarlardyń sanyn kóbeıtý jumystary bastalyp ketti. Alǵashqy bolyp munda byltyr Toǵaı buǵylary ákelindi. Qazir olardyń urǵashylaryna arnaıy baýlar taǵylyp, qozǵalysy baqylaýǵa alyndy.
«GPRS baýlar «WWF» - Búkilálemdik jabaıy tabıǵat qorynyń Qazaqstanǵa jolbarysty qaıtarý baǵdarlamasy aıasynda alyndy. Moıyn baýlardan kelip túsken málimetterdi rezervattyń ǵylymı bólimi saraptaıtyn bolady. Máselen, buǵylardyń rezervat aýmaǵyndaǵy qozǵalysy, belgili bir mekende qansha ýaqyt aıaldaýy baqylanady, tipti maral ólip qalǵan jaǵdaıda da aqparat alýǵa bolady», - deıdi rezervattyń bólim basshysy Lına Valdshmıt.
Sondaı-aq, onyń aıtýynsha, bul baýlardyń qýaty 2 jylǵa jetedi.
«Olardy qaýipsizdik maqsatynda tek urǵashy janýarlarǵa taǵýǵa bolady. Jas tóldiń ósetinin eskersek, baý olardy tunshyqtyrýy múmkin. Al erkek buǵylar óte belsenbi bolǵandyqtan, múıizimen ilip ketip, ózin jaraqattap, qondyrǵyny buzyp tastaýy múmkin», - dep oıyn tolyqtyrdy Lına Valdshmıt.
