Іle-Balqash rezervatynda turan jolbarysy mekendeıtin bolady
ALMATY. QazAqparat - Halyqaralyq jabaıy tabıǵat qory World Wildlife Found (WWF) pen QR AShM Orman sharýashylyǵy komıteti birlese otyryp Almaty oblysyna Turan jolbarystaryn qaıtarmaq, dep habarlaıdy QazAqparat tilshisi.
Bul týraly búgin Qazaqstan baspasóz klýbynda ótken baspasóz máslıhaty barysynda belgili boldy.
Turan jolbarystaryn qazaq jerine qaıtarý isine atsalysyp júrgen erikti Tımofeı Bannıkovtyń aıtýynsha, aldaǵy 5 jylda jolbarystarǵa arnalǵan terrıtorııada kúzet, qorek bazalary daıyndalady.
«Almaty oblysynyń Balqash kóliniń ońtústik jaǵalaýynda erekshe qorǵaýdaǵy aımaq ashylady.
Osy aımaqta Turan jolbarystary jiberiledi. Qazir biz atalǵan jobanyń bastapqy kezeńinde turmyz. Alǵashqy 5 jyl qorek bazasyn jasaýǵa jumsalady. Tek 2023 jylǵa taman Reseıden jolbarystardy qonystandyramyz. Bastapqyda Reseıden 20-30 shaqty jolbarys ákelinip, árqaısynyń moınyna qamyt taǵylady. Bul qamyttar arqyly qashyqtan olardyń qaıda júrgenin baqylaýǵa bolady. Qamyttaǵy batareıa qýaty 1-1,5 jylǵa jetetin bolady», - dedi T.Bannıkov.
Atalǵan jobany júzege asyrý úshin Qazaqstanda kraýnfandıng alańy ashylady.
60 kúnge sozylǵan kraýdfandıngtiń qorytyndysy boıynsha 2 200 000 teńge jınaý kózdelip otyr. Atalmysh soma mektep oqýshylaryna arnalǵan arnaıy bilim berý kontentterin jasaýǵa jumsalady.
Bıologııa páninen shyǵarylatyn materıaldardyń shyǵarylymy oqýshylardyń úsh jas kategorııasyna arnap eki tilde jasalady.
Turan jolbarystaryn elimizge qaıta oralýyn qalaǵan kez kelgen adam www.start-time.kz. saıtyna kirip, qalaǵan somasyn aýdara alady. Qomaqty qarajat kólemin aýdarǵan jandarǵa platforma tarapynan fýtbolka, tósbelgi, salpynshaq áshekeıler qarastyrylǵan.
Sonymen qatar, turan jolbarysy týraly arnaıy saıt jasalady.
Aıta ketý kerek, jyrtqysh ańdar torǵa qamalmaıdy. Olar jergilikti halyqqa qaýipti bolmas úshin «Konflıktnyı tıgr» mobıldik qosymshasy iske qosylady.
Resmı málimetterge súıensek, Qazaqstan jerinde sońǵy turan jolbarysy 70 jyl buryn ólgen. Bolashaqta Qazaqstandaǵy Іle-balqash rezervatynda 200 turan jolbarysy mekendeıtin bolady.
