Іle-Balqash óńirinde Turan jolbarysy mekendeıtin qoryq quryldy
«Keń baıtaq jerimizde kópten kútken 6 memlekettik tabıǵı rezervatymyz paıda boldy. Qazaqstan Respýblıkasy Úkimetiniń 2018 jylǵy 27 maýsymdaǵy №381 qaýlysymen Almaty oblysy Balqash aýdanynyń aýmaǵynda «Іle-Balqash memlekettik tabıǵı rezevaty» quryldy. Mekemeniń jalpy aýdany 415164,2 ga quraıdy. Bul rezervattyń basty maqsaty - qazaq jerine turan jolbarysyn qaıta jersindirý», - dep jazdy Sáken Dildahmet.
Sáken Dildahmettiń jazýynsha, bul jobany elimizge alyp kelý úshin biraz jumystar atqarylyp, uzaq jyldar boıy zertteýler júrgizilgen.
«Osy jumystardyń nátıjesinde 2017 jylǵy 8 qyrkúıekte QR Aýyl sharýashylyǵy mınıstrligi Dúnıezjúzilik jabaıy tabıǵat qorymen (WWF) jolbarysty qaıta jersindirý boıynsha memorandýmǵa qol qoıdy. Ótken ǵasyrdyń 40 jyldarynda elimizde joıylyp ketken jolbarysty qaıta oraltý úshin osy mekeme basty qyzmetti atqarmaq. Aldymyzda úlken jumys tur. Іle-Balqash óńiriniń ekologııasyn qalpyna keltirý, toǵaıly ormandy ósirý, jabaıy janýarlar sanyn kóbeıtý. Osy ıdeıamyz óz nátıjesin berip jatsa, elimizdiń ekologııasy úshin atqarylǵan úlken isterdiń biri bolmaq», - deıdi ol.
Eske sala ketsek, qazaq dalasyna jolbarys Reseı jerinen ákelinedi. Alaıda oǵan deıin Іle-Balqash rezervatynda osy jyrtqyshtarǵa qorek bolatyn ortany qalyptastyrý qajet.
