Іle Alataýynyń aǵashtaryn qalpyna keltirýge qoǵamdyq uıymdar atsalysady
ALMATY. 24 tamyz. QazAqparat /Erbol Azanbek/ - Іle Alataýy shatqalyndaǵy boran saldarynan qulaǵan aǵashtar ornyn toltyrý isine qoǵamdyq uıymdar atsalysady. Búgin «Tabıǵat» ekologııalyq odaǵynyń tóraǵasy Mels Eleýsizov arnaıy ótken baspasóz máslıhatynda osyndaı málimdeme jasady.
Onyń aıtýynsha boran saldarynan tabıǵatqa kelgen zııan orasan. Sondyqtan onyń ornyn toltyrýdy tek memlekettik mekemelerge siltep otyra berýge bolmaıdy. Sondyqtan birneshe qoǵamdyq uıym birigip, Almaty mańyndaǵy jasyl jelekti qalpyna keltirýge qatysty birqatar sharalardy qolǵa almaq. Ol bul maqsatta arnaıy qor qurylǵandyǵyn da málim etti. «Jasyl Naýryz» qoǵamdyq qoryna endi Almaty taýlarynyń kórkem tabıǵatyn qalpyna keltirýge úles qosqysy kelgen azamattar qarjy aýdaryp, kómek bildire alady.
«Medeý men Shymbulaqtyń tabıǵatyn qalpyna keltirý bárimizge paryz bolýy tıis. Óıtkeni boran saldarynan 100 myńǵa jýyq aǵashtyń qulaýynyń saldary orasan. Aǵashtardyń Almatynyń shańy men las aýasyn tazartýǵa úlesi zor bolatyn. Endigi jerde taýdaǵy qar tez erip, aýyz sý máselesin, sonymen qatar aýanyń odan ári lastanýyn týdyrýy múmkin. Almaty jurtshylyǵy ishetin sýdyń 80 paıyzy osy taý sýlarynan alynady, aýa onsyz da las», - dedi M. Eleýsizov.
Ol bul jobanyń basy retinde «Ómir uryǵy» atty jobany qolǵa alyp, Almaty mektepteriniń mańyna aǵash otyrǵyzýdy, oqýshylarǵa arnalǵan «Eko klýb» ashyp, aǵash egý men tabıǵatty qorǵaýdyń qyr-syryn úıretetindikterin aıtady.
Sonymen qatar atalǵan odaq 30 tamyz kúni «Bıttlz» festıvalin ótkizbek. Budan túsken qarjy Medeýde «Jas otbasylar» alleıasyn ashýǵa jumsalady. «Árbir jańa úılengen jas atalǵan alleıaǵa aǵash egip, Medeýde aǵash sanyn kóbeıte alady. Bul da júz myńdap qulaǵan aǵashtyń ornyn qalpyna keltirýge kómek», -dedi Tabıǵat tóraǵasy. Ol óz sózinde Almatyda aǵash qalmaı bara jatqandyǵyn da atap ótti. «Jasyl aǵashtardy kesý naýqanǵa aınaldy. Aǵashtar kesilip, kósheler keńeıtilip jatyr. Qazir qalaǵa kúnine 80 myń kólik shyǵady. Olardan ekologııaǵa orasan zor zııan kelýde. Bunymen kúresý úshin kerisinshe aǵashty kóbeıtý qajet», degen Eleýsizov, buǵan deıin Almatynyń aýasyn tazartýǵa Medeý men Shymbulaq betkeılerindegi aǵashtyń kómegi orasan bolǵandyǵyn aıtady.
Ol óz sózinde qulaǵan aǵashtardy tazalaý durys júrgizilmeı jatqandyǵyn da atap ótti. «Tazalaý juımystaryna bul salaǵa mamandanbaǵan adamdar tartylýda. Olar aǵashtardy qalaı bolsa solaı daıyndap, jer qyrtysyn buzýda», - deıdi ekolog.
