Іle Alataýynda qandaı gúlderdi julýǵa tyıym salynǵan
ALMATY. QazAqparat - «Іle-Alataýy memlekettik ulttyq tabıǵı parki» Respýblıkalyq memlekettik kásiporny Qyzyl kitapqa engen sırek jáne joıylyp bara jatqan gúldi ósimdikterdi julǵany úshin qylmystyq jaýapkershilik týraly eske saldy, dep habarlaıdy QazAqparat tilshisi.
Almaty memlekettik tabıǵı kesheni aýmaǵynda Qyzyl kitapqa engen birneshe gúldi ósimdikter - alataý báısheshegi nemese krokýs, altaı gımnospermıýmy, Kolpakovskıı ırodıktıýmy ósedi.
«Qyzyl kitapqa engen ósimdikterdi zańsyz alý, ıemdený, saqtaý, ótkizý, ákelý, áketý, salyp jiberý, tasymaldaý nemese joıý zańmen qýdalanady. QR QK-niń 339-babyna sáıkes zańdy buzǵan adamǵa 3000 AEK-ke deıingi mólsherde aıyppul salynady. Bolmasa sol mólsherde túzeý jumystaryna, ne segiz júz saǵatqa deıingi merzimge qoǵamdyq jumystarǵa tartýǵa ne úsh jylǵa deıingi merzimge bas bostandyǵyn shekteýge, nemese sol merzimge bas bostandyǵynan aıyrý jazasy taǵaıyndalady», - delingen parktiń Feısbýktegi paraqshasynda.
QR Qyzyl kitabyna engen ár gúldi ósimdikke keltirilgen zalal sommasy 0,5 aılyq eseptik kórsetkishpen baǵalanady.
