Іle Alataýynda adasyp ketken reseılik eki snoýbordıst tabyldy
ALMATY. QazAqparat - Almatyda Іle Alataýynyń baýraıynda reseılik eki snoýbordıst adasyp ketti, dep habarlaıdy QazAqparat tilshisi.
Talǵar asýynda qyz bala men 28 jastaǵy jigit adasyp ketkeni týraly habarlama búgin qutqarý qyzmetine 16:50-de tústi.
Olar taýǵa snoýbord tebýge shyqqan.
Qutqarýshylar ekıpajy qajetti quraldaryn alyp izdeýge shyqty.
Jolda olar «Shymbulaq» taý shańǵysy keshenine aqpar bergen.
Kýrort qyzmetkerleri qarmen júretin kólik tizgindep týrısterdi izdeýge qosyldy.
Biraz ýaqyttan soń olar tabyldy.
Týrıster Reseı Federatsııasynyń azamattary bolyp shyqty.
Keshke taman tuman túsip ketken soń olar qaıtar joldan adasyp ketken.
Mamandardyń aıtýynsha, olar esh japa shekpegen.
Almaty qutqarý qyzmeti jyl basynan beri osyndaı onynshy adamdy taýda adasyp ketken jerinen qutqaryp otyr.
Kazgıdromet RMK boljaýynsha, Almaty taýlarynda qar kóshkini júrý qaýpi joǵary bolyp tur.
1 sáýirde qalada daýyldy eskertý jarııalandy.
