Іle Alataýy ulttyq parkinde etnoaýyl qurylýy múmkin
ALMATY. QazAqparat - Almatyda qoǵamdyq keńes otyrysynda Іle Alataýy ulttyq parkiniń bas jospary talqylandy, dep habarlaıdy QazAqparat tilshisi.
Іle Alataýy ulttyq parki 198669 ga aýmaqty alyp jatyr.
Osylaısha ulttyq parktiń 78 549 ga terrıtorııasy qoryqtyq rejimde qorǵalady.
Qazir parktiń 104 aımaǵy - uzaq merzimdi, 25 - qysqa merzimge jalǵa berilgen.
Park ishinde 35 kempıng, 48 qonaq úı, 4 dámhana bar. Jobanyń úılestirýshisi «Terra» qashyqtan zondtaý jáne geografııalyq júıeler JShS parktiń jekelegen aımaqtaryn jalǵa berý arqyly týrıstik áleýetin arttyrýdy usynady.
«Syrttan keletinderdi Qazaqstanda ekotýrızm qyzyqtyrady. Almatyda ekotýrısterdi uzaq ustap turatyn joba kerek. Qazir Almatyǵa kelgen týrıster birden aımaqtarǵa shyǵyp ketedi. Ákimdik, basqarma, Ulttyq park basshylyǵy park aımaǵynda etnoaýyl qurýǵa múmkindik berdi. Ynta bildirip otyrǵan ınvestorlar bar. Ol úshin Bas jospar bekitilýi tıis», - dedi Qazaqstan týrıster qaýymdastyǵynyń dırektory Rashıda Sháıkenova.
Qazir atalǵan joba qoǵamdyq keńestiń talqylaýynda jatyr.
Qala turǵyny Ajar Jandosova Іle Alataýy parkiniń Alma-Arasan shatqalyndaǵydaı aqyly bolyp ketpeýin qadaǵalaýdy eskertti.
Qalalyq Týrızm jáne syrtqy baılanystar basqarmasynyń basshysy Erlan Jaılaýbaı bas jospar qabyldanǵan jaǵdaıda týrısterge jaǵdaı jasalatynyn atap ótti.
«Іle Alataýy parkimen birlese otyryp týrısterge yńǵaıly orta jasaýdy oılastyryp jatyrmyz. Almaty ákimdiginde «Týrızmdi damytýdyń 100 qadamy» atty joba qabyldandy.
Ekologııalyq týrızm tabıǵatpen tikeleı baılanysty bolǵandyqtan, QR AShM birige otyryp, qoǵamdyq keńeske shyǵýdy josparladyq. Zań boıynsha park basshylyǵy qoǵamdyq talqylaýǵa shyǵarýǵa eshqandaı mindetti emes»,- dedi Erlan Jaılaýbaı.
Qazir Іle Alataýy parkinde 44 týrıstik marshrýt jumys istep tur. Bas jospar júzege asqan jaǵdaıda olardyń barlyǵy qaıta jańǵyrtylatyn bolady.
Park dırektory Damır Malgeldıevtyń aıtýynsha, ulttyq parkke memleket tarapynan týrıstik shyǵyndardy aqtaýǵa múlde qarjy bólinbeıdi.
