Іle Alataýy ulttyq parkinde ekotýrızmdi damytý jónindegi qoǵamdyq keńes quryldy
ALMATY. QazAqparat – Almatyda Іle Alataýy ulttyq parkindegi ekotýrızmdi damytý jónindegi qoǵamdyq keńestiń alǵashqy otyrysy ótti, dep habarlaıdy QazAqparat tilshisi.
Keńes quramyna 19 adam kirdi. Olardyń qatarynda týrıstik uıym, bıznes ókilderi, ǵalymdar, sportshylar, ekobelsendiler, qoǵam qaıratkerleri bar.
Otyrysty QR ekologııa, geologııa jáne tabıǵı resýrstar vıtse-mınıstri Erlan Nysanbaev ashty.
«Eki apta ishinde ekobelsendilermen, qoǵamdyq birlestik ókilderimen kezdestim. Men bárin osy keńes quramyna kirýge shaqyrǵan edim. Búginde 30 úmitkerdiń ishinen túrli saladan 19 adam irikteldi. Memlekettik organ ókilderi alynǵan joq, tek Almaty qalasy Ekologııa departamenti dırektory jáne men ǵana barmyn», - dedi Erlan Nysanbaev.
Vıtse-mınıstrdiń aıtýynsha, búginde ulttyq parkterde ekotýrızmdi damytý úrdiske engen. Іle Alataýy ulttyq parkine de bul jat emes. Sondyqtan ony damytýda amerıkalyq damý modeli tańdaldy. Bul degenimiz týrıstik aıaqjoldar men marshrýttar salý.
«Biz bas jospar ázirledik. Negizinen saparlaý ortalyqtaryn qurý kózdelýde. 7 glempıng, kempıng, etnoaýyl, avtokerýen orny josparlanyp otyr. Biz negizinen kúrdeli irgetas salynbaıtyn nysandarǵa basymdyq bermekpiz. Jurtshylyq ulttyq park ekotýrızmin damytýǵa qatysýǵa quqyly. Biz búgin osy jerde bas qosyp, ulttyq parkte ekotýrızmdi damytý máselesin talqylamaqpyz. Mundaı keńester basqa da parkterdiń janynan qurylady. Biraq ekotýrızmdi damytý jónindegi qoǵamdyq keńes bólek bolýy kerek», - dedi Nysanbaev.
Qatysýshylar tıptik ereje jobasy men qatysýshylar tizimin taqylady. Konferentsııaǵa qatysýshylar keńes quramynan memlekettik organ ókilderin alyp tastaýdy usyndy. Usynys qabyldandy.
