Іle Alataýy parkiniń jerin qaıtarý boıynsha sotta 3 is qaralyp jatyr
ALMATY. QazAqparat - Almatyda Іle Alataýy parkiniń basshylyǵy tabıǵı ortanyń tazalyǵyn saqtaý men zańsyz alynǵan jerlerdi qaıtarý týraly QazAqparat tilshisiniń saýalyna jaýap berdi.
«Jasyl qutqarý» baspasóz máslıhatynda Іle Alataýy parkiniń biraz jeri zańsyz tartyp alynǵany týraly aıtylǵan bolatyn. Jasyl uıym ókilderi park terrıtorııasynda buzylǵan ǵımarattar, ıesiz jaılar bar ekendigin alǵa tartqan bolatyn.
Park basshylyǵy atalǵan problemalardyń bar ekendigin rastady.
«2017 jyldyń 1 qańtarynan bastap QR AShM Orman sharýashylyǵy men janýarlar álemi komıtetiniń aımaqtyq ınspektsııasymen vedomstvoaralyq komıssııa quryldy. Komıssııa sheshimderi usynymdyq sıpatta ekenin aıta ketý kerek. Komıssııa músheleri keıbir jerdi paıdallanýshylarynyń ulttyq park terrıtorııasynda qyzmet etýiniń zańdylyǵyn tekserýmen aınalysady. Olar arnaıy materıal jınap, aýdandyq ákimdikterge hat jiberedi. Aqparat tolyq jınalǵan soń bizdiń zańgerler sotqa beredi. Keıbir tulǵalardyń Ulttyq park terrıtorııasynda jumys jasaýynyń zańdylyǵy sotta sheshiledi. Qazir sotta úsh is qarastyrylyp jatyr», - dedi park basshylyǵy arnaıy saýalǵa jaýap retinde.
Park basshylyǵynyń aıtýynsha, Іle Alataýy terrıtorııasynda satyp alynǵan jekemenshik ýchaskeler de bar kórinedi.
«Bul jerler 1996 jylǵa deıin Ulttyq park qurylǵanǵa deıin satylyp alynyp, jekeshelendirilgen. Bul ýchaskeler zańdy desek bolady. Ulttyq park qurylǵan soń qorshalǵan jerler zańsyz bolyp tabylady. Endi mundaı jerlerdiń qojaıyndarymen sottasýǵa týra keledi. Odan bólek bizde jalǵa alýshylar bar. Biz jer ýchaskesin 5-49 jylǵa jalǵa beremiz. 5 jylǵa jalǵa alynǵan aýmaqta qurylys jumystaryna tyıym salynady. Tek kıiz úı, besedka, veloturaq salýǵa ǵana ruqsat beriledi.
Bul jerdegi maqsat týrızm men rekreatsııalyq baǵytty saqtap qalý», - dedi baspasóz hatshysy Dáýren Ábenov.
Al 49 jylǵa jalǵa berilgen terrıtorııada úlken qurylys salýǵa bolady.
«Alaıda ol jerler tek týrıstik maqsatta paıdalanylady. Adamdar ol jerde úı salyp turýyna bolmaıdy. Jalǵa alýshylardyń qyzmeti erekshe qorǵalatyn aımaqtardy jalǵa alý erejesimen 10,53 retteledi. Onyń barlyǵy park basshylyǵynyń qaraýynda», - dedi baspasóz hatshysy.
Qazirgi tańda Іle Alataý ulttyq parkinde 320 qyzmetker shatta, 65 qyzmetker shtattan tys jumys jasaıdy.
Munyń aldynda Іle Alataýy ulttyq parkiniń bolashaqtaǵy ózgerýi qalalyq Qoǵamdyq keńes otyrysynda talqylanǵan bolatyn.
