Іle Alataýy memlekettik- ulttyq parkine ótken jyly 113 660 adam saıahattap keldi - dırektordyń orynbasary
ALMATY. Aqpannyń 2-si. QazAqparat /Erlik Erjanuly/ - "Sporttyq qozǵalysty jandandyrý - urpaq salaýattylyǵynyń kepili. Bul Elbasynyń Qazaqstan halqyna Joldaýynda da ashyq aıtyldy", deıdi QazAqparat tilshisine suhbat bergen Іle Alataýy memlekettik-ulttyq parki dırektorynyń orynbasary Qýat Baıturbaev.
Іle Alataýy memlekettik- ulttyq parki Úkimettiń 1996 jylǵy aqpannyń 22-sindegi arnaıy qaýlysynyń negizinde qurylǵan bolatyn. Park Shamalǵan ózeniniń sol jaǵalaýynan bastap Túrgen ózenine deıingi uzyndyǵy 120, eni 30 shaqyrymdyq úlken aýmaqty alyp jatyr. Onyń jalpy jer kólemi 199 703 sharshy shaqyrymdy quraıdy.
"Onda saıahatshylar úshin 42 týrıstik baǵyt bar. Onyń 13-i ekologııalyq, 22-si attyly-jaıaý adamdarǵa, al jeteýi avtokólikti saıahatshylarǵa arnalǵan. Jyldyń jyly maýsymdarynda demalys kúnderi saıahatshylardyń basym bóligi parktiń Túrgen fılıalyndaǵy Esik kóli men sarqyramasyna barady. Qysqy maýsymda park aýmaǵynda demalystyń shanamen syrǵanaý túrleri jaqsy jolǵa qoıylǵan. Byltyr bizge 113 660 adam saıahattap keldi, al aldyńǵy jyly olar 193 myń bolǵan. Bıylǵy jyly bul 200 myńǵa jýyqtaıdy dep josparlap otyrmyz", deıdi dırektordyń orynbasary Q.Baıturbaev. Onyń aıtýynsha, Elbasynyń: "2011 jylǵy Qysqy Azııa oıyndary úshin biz daıyndap jatqan sporttyq ınfraqurylymdar óńirlerdi Astana men Almatydan qalyp qoımaýǵa ıtermeleı otyryp, buqaralyq dene shynyqtyrý-sporttyq qozǵalysyn damytý úshin qajetti alǵysharttar jasaıtyn bolady. Týrızm jáne sport mınıstrligi ákimdermen birge elde buqaralyq sportty damytý úshin birlesken is-sharalardy anyqtap, olardy naqty iske aınaldyrýy tıis", degen tapsyrmasynan keıin oǵan tolyq negiz bar dep aıtýǵa bolady.
