Іle-Alataý ulttyq saıabaǵynda kásibı foto jáne beınetúsirilimder jasaý aqyly túrde júzege asyrylady - M. Aınabekov
ALMATY. QazAqparat - Іle-Alataý ulttyq saıabaǵynyń basshylyǵy búgin Úlken Almaty kólinde foto jáne beınetúsirilim jasaýǵa tyıym salynǵandyǵy týraly aqparat jaıynda túsinikteme berdi.
Aıta ketelik, buǵan deıin áleýmettik jelilerde Úlken Almaty kólinde tyıym salynǵan qyzmetterdiń tizimi ilingen taqtanyń fotosýreti paıda bolǵan edi. Onda áýesqoı jáne kásibı foto jáne beınetúsirilimder jasaýǵa da bolmaıtyndyǵy kórsetilgen bolatyn.
Óz sózinde Іle-Alataý ulttyq saıabaǵynyń bas dırektory Marlen Aınabekov áýesqoılyq sıpattaǵy foto jáne beınetúsirilimderge tyıym salynbaǵandyǵyn atap kórsetti.
«Týrısterge sýretke túse berýlerine bolady. Biraq, kásibı túrde foto jáne beınetúsirilim jasaýǵa tek arnaıy kelisim negizinde ǵana ruqsat beriledi. Eger fılm nemese klıp túsirgińiz kelse, onda arnaıy tarıf boıynsha tólem jasaý kerek bolady. Mundaı talap, buryn da bolǵan, Іle-Alataý ulttyq saıabaǵynyń áleýmettik jelilerdegi paraqshasynda da bar. Biz bıyl saıabaqta jańartý jumystaryn júrgizdik. Solardyń ishinde taqtalardaǵy aqparatty azdap ózgerttik. Qosymsha, saıabaqqa kelý erejesin ildik», - dedi M. Aınabekov.
