Іle-Alataý ulttyq parkinen jer telimin paıdalanýǵa berý tenderi men konkýrsy ótkizilmeıdi

ALMATY. QazAqparat - Іle-Alataý ulttyq parkinen jer ýchaskelerin qysqa jáne uzaqmerzimdi paıdalanýǵa berýge arnalǵan konkýrs pen tender ótpeıtin boldy, dep habarlaıdy QazAqparat Orman sharýashylyǵy jáne janýarlar dúnıesi komıtetine silteme jasap.

Іle-Alataý memlekettik ulttyq tabıǵı parkinen jer ýchaskelerin týrıstik jáne rekreatsııalyq qyzmetti júzege asyrýǵa 25 jylǵa deıin uzaqmerzimdi jáne 5 jylǵa deıin qysqamerzimdi paıdalanýǵa berýge baǵyttalǵan konkýrs pen tender ótkizilmeıdi.

Komıtettiń málimetinshe, buǵan josparlanǵan tender men konkýrstyń ótetin ýaqytyna qatysty jiberilgen tehnıkalyq qatelik sebep bolǵan.

Eske salaıyq, 2021 jyly aqpan aıynda Іle-Alataý ulttyq parkinde Ekologııalyq týrızm ınfraqurylymyn damytýdyń bas jospary boıynsha qoǵamdyq tyńdaý ótken.

«Qoǵamdyq tyńdaý hattamasy Іle-Alataý ulttyq parki men Almaty qalasy jáne Almaty oblysy týrızm basqarmalarynyń saıtynda jarııalandy. Ulttyq parkterde týrıstik jáne rekreatsııalyq qyzmetti júzege asyrý erejesine sáıkes tender jáne konkýrs qujattarynyń jobasy da ulttyq parktiń ınternet resýrsyna salyndy.

Jaqyn arada «Іle-Alataý» MUTP tender men konkýrs boıynsha talqylaý jáne túsindirý jumysyn júrgizedi. Qabyldanatyn sheshimderdiń ashyqtyǵyn qamtamasyz etý úshin ulttyq parktiń Qoǵamdyq keńesteriniń otyrysy da ótkiziledi», delingen habarlamada.