Іle Alataý parkiniń týrısterden 44 myń teńge alǵany ras pa
Nysannyń Feısbýktegi resmı paraqshasynda Shakır Islambakıev esimdi qoldanýshyǵa jaýap berildi.
«Ashýdan jarylatyn shyǵarmyn. Myna adamdardyń Úlken Almaty kólinde 44 myń teńgesin tartyp alǵan. Kólge jaqyn kelgeni úshin! Shekarany buzǵany úshin! Myltyq asynǵan jigitter olarǵa jaqyndap kep, árqaısysynan 100 dollar talap etken. Olar qolyndaǵy baryn bergen. Bul qashanǵa deıin jalǵaspaq? Múmkin sizder ózenniń aınalasyna belgi qoıyp shyǵarsyzdar?», - dedi Shakır Islambakıev jazbasynda.
Almatylyq jigittiń narazylyǵyna Іle Alataýy ulttyq parki resmı jaýap qaıtardy.
«Úlken Almaty kóli - Almatydaǵy taza aýyz sýdyń jerústindegi jalǵyz qaınar kózi. QR Úkimetiniń 2017 jylǵy 29 jeltoqsandaǵy № 933 qaýlysyna sáıkes, Úlken Almaty kóli asa mańyzdy strategııalyq nysan bolǵandyqtan, kúzetke alynǵan. Sonymen qatar, QR Úkimetiniń 2013 jylǵy 28 tamyzdaǵy №876 qaýlysyna sáıkes ÚAK terrorıstik shabýylǵa urymtal nysan bolyp tabylady. Osyǵan baılanysty kól jaǵalaýy men gıdrotehnıkalyq qurylǵylardyń janyna barýǵa tyıym salynǵan», - dedi parktiń baspasóz hatshysy, týrızm mamany Dýlat Ábenov.
Onyń aıtýynsha, sheteldik týrısterden aqshany Іle Alataý parkiniń qyzmetkerleri almaǵan.
«Bul nysan «Almaty elektrostansasy» AQ menshigine qaraıdy. Terrorıstik aktiniń aldyn alý maqsatynda AQ pen QR ІІM mamandandyrylǵan kúzet qyzmeti kelisimge otyrǵan. Odan bólek, ÚAK shekara aımaǵynda ornalasqandyqtan, ol aımaq UQK shekara qyzmeti qyzmetkerleriniń baqylaýynda», - dedi Dýlat Ábenov.
Onyń aıtýynsha, Úlken Almaty kóliniń aınalasynda tyıym salynǵan belgiler bar.
«Ol qarjyny bizdiń qyzmetkerler almaǵan. Aqsha berý deregi boıynsha QR Sybaılas jemqorlyqqa qarsy kúrek agenttigine habarlasýyńyzdy suraımyz», - dedi ol.
Іle Alataý parki aımaǵyna kirý quny - 440 teńge. Onyń 240 teńgesi Salyq kodeksine sáıkes alynatyn alym bolsa, 200 teńge - memleket bekitken tarıf.
Al Úlken Almaty kólin sýretke nemese vıdeoǵa túsirgen kezde abaı bolý kerek. Eger kásibı jasalǵan foto nemese vıdeotúsirilim bolsa, 25000- 55 000 teńge arasynda aqy tóleýge týra keledi.