Іle Alataý parki Aleksandr Vınokýrovtyń bastamasyn qoldady
ALMATY. QazAqparat - Almatyda «Іle Alataý parki» basshylyǵy Olımpıada chempıony Aleksandr Vınokýrovtyń tazalyq týraly bastamasyn qoldady, dep habarlaıdy QazAqparat tilshisi.
Park basshylyǵy Feısbýktegi paraqshasynda qalalyqtardy tabıǵat aıasynda tazalyq saqtaýǵa shaqyrdy.
«Sizderden taýǵa demalýǵa kelgen kezde turmystyq qaldyqtardy qaldyrmaýdy suraımyz. Ókinishke oraı, taýdaǵy tazalyq - bizdiń basty problemalarymyzdyń biri. Osy túıtkildi máseleni sheshý úshin park basshylyǵy qolynan kelgendi jasap jatyr. Búginde Almaarasanda 3 tehnıkalyq jumysshy jáne 13 ormanshy tazalyq úshin jaýapty. Al parktiń terrıtorııasy 26 692 gektar ekenin eskersek, ár jumysshy 1 670 ga aımaqtyń tazalyǵyn baqylaýy kerek. Bul óte qıyn jumys. Sondyqtan tazalyqty kez-kelgen azamat saqtasa jaqsy bolar edi», - delingen jazbada.
Park basshylyǵy kadr tapshylyǵyn joıý máselesin birneshe ret kóterip kelgen.
«Biraq, jalaqysy az jumysqa ekiniń biri kelise bermeıdi. Atalǵan aımaqtan qoqys shyǵarýǵa 2 tehnıka jumyldyrylǵan. Qoqys jazda - kúnine 2 ret, qysta aptasyna 3 ret shyǵarylady», - dedi park basshylyǵy.
Aıta ketý kerek, Olımpıada chempıony Aleksandr Vınokýrov Úlken Almaty kólindegi qoqysty jınap, qalalyqtarǵa úlgi kórsetken bolatyn
