Іlbis jáne Coca-Cola: mýral avtorlary almatylyqtardyń narazylyǵyna qatysty pikir bildirdi
Jibek joly men Abylaı han kóshesiniń qıylysynda ornalasqan úıdiń qabyrǵasynda beınelengen ilbis sýreti 2017 jyly paıda boldy. Mýraldy «Balalar álemdi beıneleıdi» qoǵamdyq qory men Almaly aýdany ákimdiginiń qoldaýymen jergilikti sýretshiler Shaman men Neon salǵan.
«Bul – syrlap nemese arnaıy qurylys materıalymen jaýyp tastaǵan 4-shi nemese 5-shi qabyrǵa sýreti. Maǵan eshkim habarlasqan joq. Ruqsat ta, keshirim de suramady. Men bul týraly áleýmettik jelilerden bildim. Biz ilbistiń sýretin Mural fest halyqaralyq festıvali aıasynda saldyrtyp edik. Bul qala kúnine jasalǵan syılyq bolatyn. Onyń ústine, qar barysy – Almatynyń sımvoly», - deıdi «Balalar álemdi beıneleıdi» qoǵamdyq qorynyń dırektory, Mural Fest halyqaralyq festıvaliniń kýratory Móldir Bekjan.
Onyń aıtýynsha, 5 jyl ishinde festıval aıasynda sheteldik jáne qazaqstandyq sýretshiler qalada 50-ge jýyq ǵımaratty bezendirdi. Olar byltyr bir qabyrǵaǵa ortasha eseppen 3 mln teńgege jýyq qarjy jumsaǵan. Jobany qalalyq mádenıet basqarmasy qarjylandyrdy.
«Festıval aıasynda ákimdikpen tyǵyz jumys isteımiz. Aldymen, sýretshiler eskızderin kórsetedi, sosyn basqarmada bekitemiz. Oryndy aldyn ala belgileımiz. Festıval bastalar aldynda qalany aralaımyz, jerlerdi sýretke túsiremiz. Ashyq jáne adam kóp jınalatyn jerlerdi tańdaımyz. Barystyń qala qonaqtary men turǵyndary kóp júretin Arbat aımaǵynda ornalasqanyna qýandyq», - deıdi ol.
Al, sýretshiler Shaman men Neon úshin bul sýret alǵashqy úlken joba bolǵan.
«Úı qabyrǵasyndaǵy mýral alǵashqy jobamyz boldy. Biz óz baǵytymyzdy biriktirip, turǵyndarǵa unaıtyndaı etip jasadyq. Sýretti bir aptaǵa jýyq saldyq. Aıtpaqshy, bul – bizdiń Almatydaǵy sońǵy art-nysan», - dedi Shaman.
Onyń aıtýynsha, jýyrda Coca-Cola kompanııasy joba avtorlarymen jáne úı turǵyndarymen kezdesý uıymdastyrǵan.
«Jaqynda biz osy úıdiń turǵyndarymen, Coca-Cola kompanııasy ókilderimen kezdesý ótkizip, jobany talqyladyq. Endi jarnama kompanııasy qajetti qujattardy daıyndap, keıin ákimdikten ruqsat alady. Sosyn jumysqa kirisemiz. Bul – bizdiń jobamyz, eskızder saqtaýly, qabyrǵa sýretin qalpyna keltiremiz, bári burynǵydaı bolady. Jarnamany boıap, barysty keri qaıtaramyz», - deıdi Shaman.
Ekinshi sýretshi, mýral avtorlarynyń biri Neon da kompanııa qatelek jiberdi dep esepteıdi.
«Árıne, bul jańalyq bizdi azdap tańqaldyrdy. Olaı jasaýǵa bolmaıdy. Bul festıval aıasyndaǵy alǵashqy úlken jumysymyz bolǵan edi», - dedi ol.
Buǵan deıin Almaty ákimdigi turǵyn úılerdiń birine salynǵan ilbis mýralynyń nege aýystyrylǵanyn túsindirgen edi.
Keıin «Coca-Cola Qazaqstan» kompanııasy turǵyndardan keshirim surap, mýral qaıta qalpyna keltiriletinin aıtty.
