Ilıa Ilın: Ziltemir kóterý stılimdi tolyq ózgerttim
TALDYQORǴAN. QazAqparat - Ziltemirshiler Ilıa Ilın men Zýlfııa Chınshanlo úlken sportqa qaıta oraldy. Olar Taldyqorǵanda jalaýyn kótergen aýyr atletıkadan jeke komandalar arasyndaǵy Qazaqstan chempıonatynda baq synaıdy, dep habarlaıdy QazAqparat tilshisi.
Dopıng daýyna iligip, artynsha halyqaralyq aýyr atletıka federatsııasynyń sheshimimen sporttan shektetilgen aýyr atletter úshin bul ózderin kórsetýdiń jańa bir múmkindigi. Sondyqtan bul jarysqa Ilıa Ilın erekshe daıyndyqpen kelip otyr. Sportshy 102 kg salmaqta óner kórsetpek.
«Men ózimniń ziltemir kóterý stılimdi tolyq ózgerttim. Ony ózderińiz kóre jatarsyzdar. Dál qazir jańa tehnıkamdy meńgerý ústindemin. Sondyqtan bárin ýaqyt kórsetedi. Men úshin ýaıymdap, maǵan qoldaý kórsetken barlyq jankúıerlerime alǵysymdy bildiremin. Sizder maǵan kúsh-qýat beresizder»,- dedi Ilıa Ilın.
Sportshynyń basty maqsaty bul dodada jaqsy óner kórsetip, álem chempıonatyna joldama alý.
Aıta keteıik, Taldyqorǵan qalasyndaǵy aýyr atletıkadan jeke komandalar arysyndaǵy el chempıonatyna 140-tan astam ziltemirshi qatysýda. Jarys 2 qyrkúıekke deıin jalǵasady.
