Ilıa Ilın jetim balanyń bolashaq bilimi úshin aqsha tólep qoıdy
ASTANA. QazAqparat - Aýyr atlet Ilıa Ilın Astanadaǵy balalar úıinde tárbıelenip jatqan 13 jastaǵy Vladımır Mıgýnovtyń atyna bilim alý depozıtin ashyp berdi, dep habarlaıdy «QazAqparat» HAA tilshisi.
Aıta keteıik, buǵan deıin Londondaǵy Olımpıada oıyndarynyń chempıony, boksshy Serik Sápıev pen Rıo Olımpıadasynyń kúmis júldegeri Vasılıı Levıt te jetim balalardyń atyna ataýly bilim depozıtin ashqan bolatyn.
Bilim jáne ǵylym mınıstrligine qarasty «Qarjy ortalyǵynyń» baspasóz qyzmetinen habarlaǵandaı, Ilıa Ilın jetim balalardyń atyna ataýly bilim depozıtin ashýǵa bolady degen aqparatty estı sala, qaıyrymdy is jasaýǵa asyqqan.
«Ilıa Ilın Vladımır esimdi balamen birden til tabysyp ketti. Sondyqtan da, tańdaýy osy balaǵa túsken shyǵar. Bilim depozıtin ashýǵa kerekti qujattardy toltyryp, depozıtke alǵashqy jarnany salǵannan keıin, Ilın endi osy balamen únemi baılanysyp turatynyn aıtty»,-dep habarlap otyr «Qarjy ortalyǵynyń» baspasóz qyzmetinen.
«Vladımırge qolymnan kelgenshe kómek kórsetip otyramyn. Endi men seniń bolashaq bilimińe ǵana jaýapty emespin, sonymen qatar, saǵan úlgi bolyp, ómirde durys jol silteýim kerek. Saǵan qolymnan kelgenshe kómek kórsetýge tyrysamyn», - dedi Ilıa Vladımırmen áńgime barysynda.
Óz kezeginde, Vladımır Mıgýnov aýyr atlet Ilıa Ilınǵa jaqsy oqımyn degen ýádesin berdi.
Aıta keteıik, memlekettik bilim berý jınaqtaý júıesi - bul jańa qarjylyq qural. Osy quraldyń arqasynda Qazaqstannyń kez kelgen azamaty bilim berý depozıtin asha alady.
