Ilıa Ilın shildede A.Hrapatyı atyndaǵy týrnırdiń tuǵyryna kóterilmek nıette
ASTANA. QazAqparat - Álemniń úsh dúrkin chempıony, Olımpıada oıyndarynyń eki márte jeńimpazy ziltemirshi Ilıa Ilın shildede ótetin Anatolıı Hrapatyı atyndaǵy týrnırge qatysady. Aýyr atletshi jerlesimiz ben onyń komandalastary Eýropadan oralyp, jattyǵýdy Qazaqstanda jalǵastyrýǵa da kirisken. Bul týraly Vesti.kz. jazady.
«Eýropadaǵy jattyǵý jıyny keremet ótti dep aıtýǵa bolady, al eger meniń ózime kelsek «70 paıyzǵa daıynmyn» dep baǵalaı alamyn. Álbette, jarysqa deıin (Almatyda ótetin álem chempıonaty-avt.) jarty jyldaı ýaqyt bar. Endeshe, 100 paıyzdyq nátıje kórsetý úshin de ýaqyt jetkilikti degen sóz», - deıdi Ilıa Ilın.
Onyń aıtýynsha, qazaqstandyq komandanyń daıyndyǵyn da joǵary baǵalaýǵa bolady. «Jaraqattanǵan eshkim joq, tolyǵymen Azııa oıyndary men Almatyda ótetin álem chempıonatyna ázirlikke kirisýdemiz», - dedi ziltemirshi. I. Ilınnyń aıtýynsha, qazir qazaqstandyq komanda eki aılyq jattyǵý jıynyn Astanada ótkizý úshin jınalýda. «Men Almatyǵa shilde aıynda qaıta oralamyn. Osynda Anatolıı Hrapatyı atyndaǵy týrnırde ózimniń bar sheberligimdi kórsetsem deımin. Óıtkeni, bul álem chempıonatynyń irikteý týrınıri bolyp sanalady», - deıdi I. Ilın.
Eske sala ketsek, Almatydaǵy álem chempıonaty aǵymdaǵy jyldyń qarasha aıyna josparlanǵan. Azııa oıyndary da osy álem chempıonatynyń qarsańynda ótkiziletini málim. Al Ilıa Ilın negizinen álem chempıonatyna ǵana qatysýdy nysanaǵa alyp otyr. «Eger Azıada men álemdik dodanyń aralyǵynda tym bolmasa úsh aılyq úzilis bolǵanynda ony da kórýge bolatyn edi. Degenmen, meniń basty maqsatym - Rıo-de-Janeıroda ótetin Olımpıada, soǵan barymdy salýǵa tıispin. Sondyqtan táýekelden tartyna turǵandy jón sanadym», - dedi ol.
