Ilıa Ilın: Rıo Olımpıadasyna keshiktim
ASTANA. QazAqparat - Eki dúrkin Olımpıada chempıony, aýyr atlet Ilıa Ilın dopıng daýyna baılanysty bıylǵy Rıo-de-Janeıro Olımpıadasyna bara almaıtynyn málim etti.
«Rıo oıyndaryna keshigip qalǵan shyǵarmyz...»,-dedi sportshy búgin keshke jattyǵý bólmesine Astana jýrnalısterin shaqyryp, áńgimelesken kezde.
Halyqaralyq aýyr atletıka federatsııasy 2012 jylǵy London Olımpıadasyna qosa, endi Ilıany 2008 jyly Beıjiń Olımpıadasynda da dopıngke jatatyn preparattar qoldandy dep aıyptap otyr.
«Rıo oıyndaryna baryp úlgermeıtin shyǵarmyn... Kelesi Olımpıada Tokıoda ótedi. Jalpy, dopıng daýynan keıin saǵym qatty synǵan joq, sebebi, áli jaspyn, boıymda kúsh-qýatym bar, ıaǵnı, men áli ózimdi dáleldeı alamyn degen sóz. Tipti, osy daýdyń aıaǵy men qalaǵandaı bolmasa da men sportty tastamaımyn»,-dedi Ilıa.
Aýyr atlet artynan ergen jas sportshylarǵa sabaq bergisi keletinin de aıtty.
«Men aýyr atletıkany qatty jaqsy kóremin, sportty jaqsy kóremin. Myna daý qalaı aıaqtalsa da, men sporttan ketpeımin. Meni jattyǵý ústinde kórgisi keletin jastar kóp, men olarǵa ziltemirdi qalaı kóterý keregin úırete alamyn. Jattyǵý zalyna kelsem, janym jaı tabady, bul jer meniń úıimdeı»,-deıdi Ilıa.
