Ilıa Ilın Reseı Prezıdentiniń Kýbogy úshin ótetin halyqaralyq týrnırge qatyspaq
ASTANA. QazAqparat - 12-13 jeltoqsan kúnderi Groznyı qalasynda Aýyr atletıka boıynsha Reseı Federatsııasy Prezıdentiniń Kýbogy úshin besinshi halyqaralyq týrnır ótedi.
AQSh-tyń Hıýston qalasynda Aýyr atletıkadan álem chempıonaty kúni keshe aıaqtalǵanmen, aýyr ziltemirdi kóterip, jurtshylyqty tańǵaldyratyn sportshylar endi Groznyı qalasynda bas qosyp, taǵy da óz kúshterin dúnıe júzine pash etpekshi.
Reseı Aýyr atletıka federatsııasynyń prezıdenti Sergeı Syrtsovtyń aıtýynsha, bıyl RF Prezıdentiniń Kýbogy Halyqaralyq aýyr atletıka federatsııasy (IWF) tarapynan aıryqsha mártebe alyp otyr. Aıtalyq, týrnır besinshi mereıtoılyq jylynda ótkeli tur, ekinshiden, osy jarys aıasynda Reseıde aýyr atletıkanyń bastaý alǵanyna 130 jyldyq mereıtoıy atap ótiletinimen erekshelenetin bolsa, sondaı-aq sportshylar osy týrnırde 2016 jylǵy Olımpıadaǵa lıtsenzııa utyp alý múmkindigine ıe bolyp otyr.
Buǵan deıin Qytaıda ótken halyqaralyq týrnırde jeńil jáne orta salmaqtyń ókilderi kúsh synasqan bolsa, al Qap taýynda alyptar kim myqtyny anyqtaıdy. Onda áıelder arasynda eki, erler úsh salmaq boıynsha synǵa túsedi. Naqtylap aıtar bolsaq, áıelder 75 kelige deıin jáne 75 keliden joǵary salmaq boıynsha kúsh synasady. Al erler arasynda 94 jáne 105 kelige deıin, sondaı-aq asa aýyr (105 keliden joǵary) salmaqtaǵy ziltemirshiler osy týrnırge qatysý múmkindigine ıe bolyp otyr.
Uıymdastyrýshylardyń málimetine súıensek, qazirdiń ózinde atalǵan týrnırge álemniń 20 eli ózderiniń sportshylary qatysatynyn málimdegen. Sonyń ishinde 105 kelige deıingi salmaq boıynsha Qazaqstannyń álemge áıgili sportshysy, Olımpıadanyń eki dúrkin, álemniń tórt márte jeńimpazy Ilıa Ilınniń qatysýǵa ótinish berip qoıǵany belgili. Al 105 keliden joǵary salmaqta Reseıdiń tanymal atleti, 2014 jyly Almaty qalasynda ótken Álem chempıonatynyń jeńimpazy Rýslan Albegov qatysatyny josparlanyp otyr. Álem nazaryn aýdaratyn osy Gran-prı týrnırine qazaqstandyq jankúıerler de erekshe kóńil bóletini anyq. Óıtkeni bul jarysta Ilıa Ilınniń jeńisti jolyn jalǵastyrǵanyn asyǵa kúteri sózsiz.
Bul kúnderi qyzý daıyndyq jumystary júrip jatyr. Osy sharany uıymdastyrý komıtetiniń kezekti otyrysynda týrnırdi telearnalardan kórsetý máselesine de basa kóńil bólindi. Kóptegen elderdiń alyptary bas qosatyn bul báseke Búkilreseılik memlekettik televızııalyq jáne radıo habarlaryn taratý kompanııasynyń arnalary boıynsha jáne «Eýrosport» telearnasynda kórsetiletini josparlanýda.
Jan-jaqtan kelgen bapkerler men sportshylar «Groznyı-Sıtı» qonaq úıine ornalaspaqshy. Aýyr atletshilerdi dopıngke tekserý júrgizý rásimimen qatmamasyz etý máselesi de qolǵa alynǵan. Búgingi tańda jeńimpazdarǵa beriletin medaldar men Kýboktyń kishireıtilgen kóshirmesine tapsyrys berilgeni anyqtalyp otyr.
Reseı Prezıdentiniń kýbogy «Olımpıısk» sport kesheninde sarapqa salynady.
