Ilıa Ilın: Óz kúshimmen tapqan eki júldemdi eshkimge bergim joq
ASTANA. QazAqparat - Dopıngke qarsy sharany buzǵany úshin Rıo Olımpıadasynan shettetilip otyrǵan Qazaqstannyń aýyr atleti Ilıa Ilın Beıjiń men Londondaǵy júldelerin qaıtyp bermeý úshin barymdy salamyn deıdi. Sportshy dopıng qoldanbaǵanyna senimdi jáne shet eldiń zańgerlerin tartyp, halyqaralyq aýyr atletıka federatsııasynyń zertteýin joqqa shyǵarmaq.
«Dál qazirgi jaǵdaı boıynsha, meniń eki medalimdi alyp qoımaqshy. Men ol júldelerimdi bergim kelmeıdi, sebebi, ol medalderdi men taza eńbegimmen taptym, men dopıng paıdalanǵan emespin, men taza kúshimmen oryn aldym...»,-dedi sportshy búgin Astanada jýrnalıstermen áńgimelese otyryp.
Ilıa tipti jattyǵý zalynda túnegenin, eki Olımpıada oıyndarynda da altyn medal alý úshin tipti múmkin emes degen jattyǵýlar jasaǵanyn aıtyp, kóńili bosady.
«Jattyǵý zalynda tekten tekke túnep, eki Olımpıada oıyndarynda da múmkin emes degen jattyǵýlar jasadym. Bul adamnyń taǵdyry emes pe, segiz jyl buryn taza shyqqan saraptamany qaıta qazyp, adamnyń taǵdyryn oıynshyqqa aınaldyrý adamgershilikke jatpaıdy»,-dedi Ilıa.
Esterińizge sala keteıik, aýyr atlet Ilıa Ilınniń 2008 jáne 2012 Olımpıada oıyndaryndaǵy dopıng synamasynda dopıng izderi tabylǵan dep habarlandy. Biraq, Ilıa bul jalǵan aıyp ekenin jáne óziniń taza ekenin dáleldeımin dep otyr.
